Қарағандыда «Көшбасшы жолы» киносының жалғасы түсірілуде

ҚАРАҒАНДЫ. 24 тамыз. Қарағандыда көпсериялы «Көшбасшы жолы» киноэпопеясының жалғасы түсіріліп жатыр. Бұл туралы egemen.kz тілшісі хабарлады. Бүгінгі таңда облыс орталығындағы Кеншілердің мәдениет үйінің алды түсірілім алаңына айналған. Массовкаға қатысатын мыңдаған адам мен қазақстандық және ресейлік актерлер уақытпен санаспай еңбек етіп жатыр. Фильм сценарийі бойынша 1989 жылы орын алған кеншілердің толқуы түсірілу үстінде. Түсірілімге жетекшілік етуші ресейлік режиссер Сергей Снежкин. Оның есімі «Брежнев», «Белая гвардия» телесериалдары, «Сталинград», «Похороните меня за плинтусом» атты фильмдер арқылы белгілі. Ал басты рольді 36 жастағы қазақстандық актер Берік Айтжанов сомдайды. Фильм Тәуелсіздік күні мерекесі қарсаңында прокатқа шығуы тиіс деп жоспарланған. Қайрат Әбілдинов. Дерек, сурет: egemen.kz.