Елбасы Литва премьер-министрі Альгирдас Буткявичюспен кездесті

АСТАНА. 21 мамыр. Мемлекет басшысы VIII Астана экономикалық форумына қатысуға келген Литва премьер-министрі Альгирдас Буткявичюспен кездесті. Бұл туралы akorda.kz хабарлады. Кездесу барысында екіжақты, соның ішінде сауда-экономикалық және инвестициялық салалардағы өзара ықпалдастық мәселелері талқыланды. Елбасы 2007-2009 жылдардағы жаһандық қаржы-экономикалық дағдарысқа жауап ретінде ұйымдастырылған форумға қатысатыны үшін Литва премьер-министріне алғыс айтты. «Форумға 90 елден келген 3 000 делегат қатысады. Біз Қазақстанның инфрақұрылымдық және индустриялық даму тұрғысынан қабылдап жатқан шаралары мен жүзеге асырып жатқан өзге де бағдарламалары туралы айтпақ ниеттеміз», – деді Мемлекет басшысы. Нұрсұлтан Назарбаев екі елдің арасындағы саяси диалог пен экономикалық ынтымақтастықтың деңгейі жоғары екенін атап өтті. «Литвамен әрқашан жақсы қарым-қатынаста болдық. Сіздің сапарыңыз ынтымақтастықты одан әрі кеңейтуге қызмет етеді деп үміттенемін», – деді Президент. Альгирдас Буткявичюс екіжақты қарым-қатынастарды нығайтуға және дамытуға қосқан елеулі үлесі үшін Қазақстан Президентіне алғыс айтты. «Қазақстан Литваның Орталық Азиядағы маңызды серіктесі болып саналады», – деді ол. Литва премьер-министрі сондай-ақ, Нұрсұлтан Назарбаевты ел Президенті лауазымына қайта сайлануымен құттықтап, Қазақстанның алға қойған барлық мақсаттарына жететініне сенімділік білдірді. Еламан Қоңыр. Дерек, сурет: akorda.kz.