Мемлекет басшысы Люксембург премьер-министрін қабылдады

АСТАНА. 21 мамыр. Елбасы VIII Астана экономикалық форумына қатысуға келген Люксембург премьер-министрі Ксавье Беттельді қабылдады. Бұл туралы akorda.kz хабарлады. Кездесу барысында екі елдің ынтымақтастығын нығайту тетіктері қарастырылды. Сондай-ақ, Қазақстан мен Еуропалық одақ арасындағы қарым-қатынастарды аталған Одаққа Люксембургтің алдағы төрағалығы аясында күшейту мәселелері сөз болды. Мемлекет басшысы біздің еліміз былтыр Қазақстан мен Еуропалық одақтың кеңейтілген серіктестігі мен ынтымақтастығы туралы келісім жобасы жөніндегі келіссөздерді аяқтау туралы құжатқа қол қойғанын еске салды. «Сіздер төрағалық еткен кезеңде осы үдерістер аяқталады деп үміттенемін. Елдеріміздің достық қатынастарын ескере отырып, Еуропалық одақпен өзара ықпалдастық кезінде виза режимін жеңілдетуді, авиация саласындағы шектеулерді алып тастауды қамтитын бірқатар мәселелерді шешу ісінде сіздің қолдауыңызға сүйенеміз», – деді Нұрсұлтан Назарбаев. Тараптар Қазақстан мен Люксембург арасындағы ынтымақтастықты әрі қарай нығайтудың маңыздылығын атап өтті. Еламан Қоңыр. Дерек, сурет: akorda.kz.