Елбасы Оралдағы ресми іс-шаралар сарайында болды

АСТАНА. 2 сәуір. Елбасы Батыс Қазақстан облысына сапары барысында ресми іс-шаралар сарайында болды. Ол жерде Президент Батыс Қазақстан облысындағы этно-мәдени бірлестіктер, шығармашыл зиялы қауым өкілдерімен және Ауған соғысы жауынгерлерімен әңгімелесті. Бұл туралы Ақорданың баспасөз қызметіне сүйеніп egemen.kz хабарлады. Мемлекет басшысы Қазақстан халқы ассамблеясы қызметінің маңыздылығына тоқталды. «Бір-бірімізге деген құрмет, толеранттылық болғанда ғана елдің орнықты дамуы сақталады. Мен Қазақстан халықтың бірлігінің арқасында ғана ілгерілеп келе жатқанын үнемі айтып келемін. Ұлы Отан соғысындағы Жеңістің 70 жылдығы таяп қалды. Біздің бақытымыз – жеңімпаз әкелердің балалары болғандығымыз. Бізге ардагерлерімізді қадірлеп, жастарды тарихқа құрметпен қарау тұрғысынан тәрбиелеу қажет. Сондай-ақ, біз биыл басқа да маңызды даталарды атап өтетін боламыз», – деді Нұрсұлтан Назарбаев. Барлық этностардың атынан сөйлеушілер Мемлекет басшысына татулық пен келісімге, кәсіпкерлікпен айналысуға мол мүмкіндіктер мен жағдайлар жасауға, халықтың әл-ауқатын арттыруға бағытталған саясат үшін алғыс айтты. Еламан Қоңыр. Дерек, сурет: egemen.kz.