ТАРАЗ. 3 шілде. Облыс орталығындағы «Жеңіс» саябағында Жамбыл облысы ішкі істер департаменті есірткі бизнесіне қарсы күрес басқармасы қызметкерлерінің бастамасымен Тараз қаласы әкімдігі ішкі саясат басқармасының «Тараз Жастар орталығы», Жамбыл облыстық салауатты өмір салтын қалыптастыру орталығы және «Бір Болашақ» жастар қоғамдық бірлестігінің қолдауымен «Тараз – нашақорлықсыз қала!» атты акция өтті. Бұл туралы egemen.kz тілшісі хабарлады.
«Адамның денсаулығы – қоғам байлығы. Әрбір адам өз денсаулығының мықты болуы жолдарын қарастырады. Отанымыздың келешегі мен көркеюі өзіміздің қолымызда. Салауатты өмір сүрудің негізі – жаман әдеттерден аулақ болу. Ал салауатты өмір сүруге кері ықпал тигізетін індет – ол нашақорлық» дейді бұл жөнінде Жамбыл облыстық салауатты өмір салтын қалыптастыру орталығының директоры Гүлжан Иманбекова. ІІД есірткі бизнесіне қарсы күрес басқармасының аға инспекторы, полиция подполковнигі Василий Дубский: «Қазіргі уақытта нашақорлық мәселесі әлемдік қоғамдастықта өзекті болып қалуда және оның салдары ретінде жастар арасында есірткіні пайдаланумен байланысты ахуал барлық елдер үкіметінің алаңдаушылығын арттырып отыр» деді. Полиция полковнигі нашақорлыққа қарсы күрес мәселесінде белсенді жұмыс атқарғаны үшін ҰҚД «Оңтүстік - Арылу» қоғамдық бірлестігінің басшысы Дәурен Бақжановты ішкі істер министрі, полиция генерал-майоры Қ.Қасымовтың грамотасымен марапаттады. ІІД ЕБҚКБ қызметкерлері де бұл күні олжаға кенелді, білдей бес қызметкеріне ішкі саясат басқармасының алғыс хаты табыс етілді.
Салтанатты шарада ІІД кинология орталығы арнайы даярланған иттердің көрсетілімі шараға шырай бергендей. Акция соңында ұйымдастырушылар әзірлеген концерттік бағдарлама жалғасын тауып, барлық атсалысушыларға «Наркопост» және «Есірткісіз болашақ» атты журналдары тартылды.
Оралхан Дәуіт.
Дерек, сурет: egemen.kz.
