Футбол. АҚШ әйелдер құрамасы – әлем чемпионы!

АСТАНА. 6 шілде. Өткен түнде Канадада футболдан әйелдер арасындағы әлем чемпионаты аяқталды. Финалда АҚШ пен Жапония құрамалары кездесіп, америкалықтар 5:2 есебімен жеңіске жетті. Бұл туралы egemen.kz хабарлады. Шешуші ойында АҚШ-тың басымдығы анық байқалды. Тіпті кездесудің 16-минутында Солтүстік Америка құрлығының өкілдері 4:0 есебімен алда тұрды. Бұл төрт голдың үшеуі К.Ллойд есімді футболшының еншісіне жазылды. Үзіліске дейін жапондар бір голмен қарымта қайтара алды. Ал екінші таймда қарсыластар бір-бірден гол соқты. Нәтижесінде, АҚШ құрамасы ірі есеппен жеңіске жетіп, әлем чемпионы атанды. Осымен аталған құрама үшінші рет әлемдік мундиальда топ жарып отыр. Канададағы додада үшінші орын Англия құрамасына бұйырды. Аталген ел қола жүлде үшін болған ойында Германияны 1:0 есебімен жеңді. Осы ретте жеңіс голы қосымша таймда пенальтиден соғылғанын айта кетейік. Еламан Қоңыр. Дерек: egemen.kz. Сурет: fifa.com.