Қамданған қапы қалмайды

Сіз не дейсіз? Биылғы жылғы жерді қуыр­ған аптап ыстық пен қуаң­шы­лық әлем­нің кейбір аймақта­рын­да тө­тенше жағдайлар туғызу­да. Әсіре­се, бізбен көрші қоныс теп­кен Ресей елінің ормандары отқа оранып, тіл­сіз жау елді ме­кен­­дер мен жа­сыл желектерді жал­мап барады. Осыған бай­ла­нысты ҚР Үкіметі де селектор­лық мәжіліс өткізіп, ай­мақ бас­шыларына атам қазақтың “Сақ­тансаң – сақтармын” деген аталы сөзін қадап айтты. Сыр аймағында ағымдағы жы­лы еліміздің өзге аймақ­та­ры­мен са­лыстырғанда аптап ыс­тық ерекше күш алған. “Егемен Қазақстан” газетінің Қызылорда облысындағы меншікті тілшісі Еркін Әбіл облыстық төтенше жағдайлар жөніндегі департаменті мемлекеттік өрт бақылау басқармасының бастығы Асқар ҚОЖАҚОВҚА: – Сіз не дейсіз? – Ауа райын болжаушы­лар­дың айтуына сенер болсақ, Сыр аймағындағы күн ыстығы қыр­күйек айының бел ортасына дейін бармақ. Демек, жоғарыда өзіңіз айтқандай, қамданған жан қапы қалмаса керек. Ағымдағы жыл ба­сында облыс әкімдігі өрт қауіп­сіз­дігін болдырмау шараларын өт­кі­зу­дің кестесін бекітті. Осыған бай­ланысты біздің мекеме ықпалымен “Орман” және “Саяжай” шара­ларын өткіздік. Бүгінде облыс аумағында ор­ман және жануарлар әлемін қор­ғау жөнінде 8 мемлекеттік мекеме жұмыс істейді. Егер саралап айтар болсам, біздің аймақта 6519,1 мың гек­тар орман қоры бар болса, оның 3037 мың гектары жасыл же­лекке оранған орманды жер. Сондай-ақ, облыстық орман және жануарлар әлемін қорғау жөнін­де­гі мемлекеттік мекемесінің ор­ман­ды алқабы 3 млн. 738 мың гек­тарды құрайды. Осыншама жердің қазіргі таңда 4745,5 шақырым жері жыртылып, минералды жолақ жа­салды. Сонымен бірге 1036 шақы­рым жер мен жаңадан жыртылған 174 шақырым жолақ күнделікті бақылауға алынып отыр. Сөз орайы келгенде айта ке­тейін, әрбір адам тілсіз жаудан сақ болып, қоршаған ортаны қор­ғау­дағы жауапкершіліктерін сезіне бі­луге міндетті. Осыны жұртшы­лық­тың жүректеріне жеткізу мақса­тын­да түсіністік, оқу-жаттығу ша­раларын жоспарлы жүргізудеміз. Біздің мамандар апта сайын сая­жай иелері мен тұрғындар ара­сын­да насихат жұмыстарын жүргізеді. Бүгінгі күнге дейін 471 үйдің еге­сіне өрт қауіпсіздігін сақтау жө­нінде нұсқамалар берілсе, халық көп жиналатын жерлерге 595 дана үнпарақтар ілініп қойылды. Үстіміздегі жылы кестеге сәй­кес өрт-тактикалық жаттығуларын өткізудеміз. Бұл жаттығуларға тек қана өрт сөндірушілер емес, жер­гі­лікті тұрғындар, көлік және ком­муникация мекемелері, ерікті өрт сөндіру құрылымдары, өрт пойыз­дары қатысуда. Жақында ғана өткізілген осы жаттығуға 150-ден ас­там адам мен ондаған техника қатысты. Біздің Сыр аймағындағы мына бір жәйтті де айтпасқа болмас. Ор­манды алқаптарды қорғау мақ­сатында өрт химиялық стансалары өте қажет-ақ. Содан да барлық аудандарда осындай стансаларды ашсақ, құба-құп болар еді. Сөз соңында айтарым, орман­ды алқапты, оны айтасыз, саяжай мен тұрғын үйлерді, мемлекеттік ғимараттарды тілсіз жаудан қорғау – баршамызға ортақ міндет екенін естен шығармайық. Қызылорда.