“Балапанды” үш жылда санаймыз

Елбасы Үкіметке “Балапан” бағдар­ламасын алғашқы жарты жылдықтан бастап-ақ жүзеге асыруды тапсырғаны мәлім. Мақсат — 2020 жылға дейін еліміздегі барлық бүлдіршін балабақшамен қамтылуы тиіс. Елбасы тапсырмасына сәйкес облыс әкімі Елеусін Сағындықов облыстық білім басқармасына 2015 жылға дейін “Балапан” бағдарламасын толық жүзеге асыруды міндеттеген болатын. Басқарма бастығы Аманғали Құдайбергенов бұл тапсырма Ақтөбе өңірінде небәрі үш жылда атқарылатындығын нық сеніммен айтады: — Себеп: облыс экономикасы жақсы. Бұл – бір. Екіншіден, біздің облыс балабақшамен қамтуда алдыңғы лекте, яғни Қостанай (90,3 пайыз), Қарағанды (69,6 пайыз) облыстары­нан кейінгі орында. Жүйелі және сатылы жұмыстың нәти­жесін­де, соңғы үш жылда мектепке дейінгі балалар мекемелерінің желісі бес есе ұлғай­ды. Бұл –бүлдіршіндердің 64,7 пайызы балабақшалармен қамтылды деген сөз. Бүл­діршіндерінің 17, 22 пайызын ғана қамтыған өңірлер бар. 1 пайыз – 500 бала. Ал 500 бала мектепке дейінгі білім беру мекемесіне бару үшін кем дегенде 3 нысан керек, – дейді Аманғали Құдайбергенов. Ол “Бала­пан­ды” міндеттелген межеден бұрын бітірудің тағы бір себебі туралы былай дейді: – Бағдарламаға байланысты бүлдіршін­дер 3 жастан бастап балабақшаға алынады (дәл қазір облыста 3-6 жастағы 30 379 бала бар). Мұны есепке алсақ, біз бағдарламаны жыл аяғының өзінде-ақ орындаймыз. Жыл сайын облыс бойынша бала саны шамамен 7 пайызға (3-4 мың сәби) өседі. Жоспар барысында біз осы демографиялық жағдайды да ескеріп отырмыз, — дейді ол. Мемлекеттік бағдарламаны жүзеге асыруда республикалық та, жергілікті де бюджеттерден жеткілікті мөлшерде қаржы бөлінеді. Мысалы, биыл республикалық бюджеттен 5, жергілікті бюджеттен 6 балабақшаның құрылысы бастал­ды. Қаланың өзінде үш балабақшаның құры­лысы басталмақ. Облыс орталығындағы екі балабақша ғимараты қайтарылып, пайдалануға беріледі. Жалпы, жыл аяғына дейін облыс бойынша 6 мектепке дейінгі білім беру меке­месінің нысаны қайтарылады деп жоспар­ланып отыр. – Балабақша проблемасының оң ше­ші­луіне мектепке дейінгі білім беру меке­ме­лері­нің құрылысын салуда, пайдалануға беруде нақ­ты талаптар қойылмайтындығы да себеп бо­лып отыр. Мысалы, балабақ­ша­ның әр бүл­дір­шінге есептегендегі шаршы метрі аз болуы мүм­кін. Және тұрғын үйлердің төменгі қа­ба­ты­нан шағын балабақшалар ашуға рұқсат етіл­ді. Сондай-ақ пәтерлерден де ашуға болады. Үкімет басшысы Кәрім Мәсімов алқа мәжілісінде “Балапан” бағдарламасын жүзеге асыруда бюджет ресурстарына үміт арту – орындалмайтын міндет екендігін айтты. Сондықтан мемлекеттік-жекеменшік әріптес­тік­тің, жеке бизнесті балабақшаларды салу мен күтіп-ұстауға тартудың жаңа тетіктерін іздеу қажеттігін тапсырды. Балабақша, шағын орталықтар салу жөнінде өз ұсыныстарын айтқан кәсіпкерлер жоқ емес. Былтыр жыл аяғында Ақтөбе қаласынан жергілікті кәсіпкер шағын балабақша ашқан болатын. Биыл 60 орындық шағын балабақша пайдалануға беріледі, – дейді басқарма бастығы. Жалпы биыл облыста 86 мектепке дейінгі білім беру мекемесі ашылады деп жоспар­ланып отыр. Оның 21-і Ақтөбе қаласында пайдалануға беріледі. Бұл 2580 балдырған балабақшамен қамтылады деген сөз. 1991 жылы облыс бойынша 438 бала­бақ­ша болған еді. 1999 жылы бұл көрсеткіш – 68. Қазір 389 мектепке дейінгі білім беру ме­ке­месінде 28619 бүлдіршін тәрбиеленіп жа­тыр. Бүгінде Ақтөбенің өзінде мектепке дейінгі білім беру мекемелеріне бармаған балабақша жасындағы 10 мың бүлдіршін бар. Соның 8 мыңы кезек күтіп жүр. Қала тұр­ғын­дарының саны өсіп келе жатқандығын ескерсек, бұл көрсеткіш көбейе түсуі де мүм­кін. Соған қарамастан, 2010 жылдың аяғына қарай облыстағы балдырғандардың (1-6 жас) 80 пайызы балабақшамен қамтылатын болады. Гүлжан БАЗЫЛҚЫЗЫ. Ақтөбе.