“Рахат” Қызылағаштықтарға амандық тілейді

Талдықорған облысы Қызылағаш ауылын бұзып-жарып өткен су тасқынынан кейін, небәрі бірнеше ай өткенде жаңа дәрігерлік емхана іске қосылды. Қайғылы жағдай орын алғанға дейін, бұл емхана қабырғасы құлағалы тұрған, едені шіріген, терезе жиектері қисайған, тек бір ғана қабаты пайдалануға жарайтын, қос қабатты ескі ғимарат болатын. Аз мерзім ішінде ол толығымен “Рахат” компания­сының күшімен жаңғыртылды. Бүгінде бұл ғимарат кең, жарық, жақсы жабдықталған, қазіргі заманғы корпус санатында. Ақсу аудандық ауруханасының бас дәрігері Әшім­ғали Жұмагелдіұлының айтуынша, құры­лыс­шылардың атқарған жұмысы орасан. Байланыстың барлық желісі жүргізілді, жылу, қуат көздері, жарық беру, өрт және күзет бойынша дабыл беру жүйесі жөн­деліп, іске қосылды. Су жылытатын құрылғылар са­тып алынып, ор­натылды және медициналық жаб­дықтарды монтаж­дау жүргізілді. Емхана қайта тұрғызылғанға дейін, бүкіл “дә­­рігер­лік бөлім” палаткаларға орналастырылды. Бі­реуінде ем-шаралар қолданылып жатса, екін­ші­сінде қабылдау жүр­гізіліп жатты, ал үшіншісінде дәріхана жұмыс істеді. Төртіншісі “күтпеген жағдайлар бола қалса” деген оймен резервте тұрды. Қазіргі кезде емхана дәрігерлері науқастарды қа­былдап, алдын ала тексерулер жүргізеді, қалада­ғыдай қолайлы жағдайларда тұрғындарға екпе жасайды. Күндізгі стационар ашылған, зертхана жұмыс істейді. Емделушілердің физиологиялық тұрғыда ем-ша­ра­ларды толығынан алу мүмкіндігі бар. Жас ана мектебі және ана мен бала кабинеті келушілерге есігін айқара ашты. Тұрғындар өмірдің қалыпты ырғағы басталғанына, әсіресе, ауыл үшін маңызы зор дәрігерлік мекеменің ісі жолға қойылғанына риза. Ал қызылағаштық емхана ”рахаттықтар” үшін құрылысы аяқталған ны­сан болып қана қоймай, шыдамдылықты шыңдаған, әлеумет алдында табысты тапсырылған маңызы зор емтихан болды. Қызылағаш ауылындағы дәрігерлік емхана қайы­рым­дылық көмек ретінде көрсетілген “Рахат” АҚ-тың жеке қаражаты есебінен және Алматы кон­ди­тер фабрикасы жұмыскерлерінің күшімен жаңғыр­ты­лып, қайта салынды. Сұңғат ӘЛІПБАЙ.