Комиссия жұмысы ширатуды қажетсінеді

“Нұр Отан” ХДП Орталық аппаратында “Батыс Еуропа – Батыс Қытай”  халықаралық транзиттік дәлізінің құрылысына бақылау жүргізу мәселесіне арналған Мемлекеттік қаржыларды жүйелі пайдалануды бақылау жөніндегі комиссияның  кезекті отырысы өтті. Онда аталған ауқымды жобаның белгілі бір кезең аралығын қамтыған қорытындысы шығарылды. Оған аталған комиссияның төрайымы, Парламент Мәжілісінің депутаты Гүлжан Қарағұсова қатысты. Стратегиялық маңызға ие инфрақұрылымдық жобаны жүзеге асыру – бүгінде арнайы құрылған сарапшылар тобының айрықша назарында тұрғандығы белгілі. Бұл ретте партия мүшелері тиісті мони­торинг жүргізіп, әр тоқсан сайын өткізетін кездесулерінде аталған жо­баның жай-күйіне жан-жақты баға береді. Яғни, бүгінде көлік магистралі нысандарындағы ауқым­ды жұмыстарды сарапшылар тобының мүшелері, Парламент депутаттары, сондай-ақ, партиялық бақылау бөлімшелері атқаруда. Отырыс барысында еліміздің Көлік және коммуникация вице-министрі Дулат Күтербеков комис­сияның алдыңғы отырысында қа­былданған ұсынымдар мен олар­дың орындалу барысы жөнінде баян­даса, ал аймақтық қоғамдық ко­миссияның жетекшілері, депу­таттар Ақтөбе, Алматы, Жамбыл, Қызылорда және Оңтүстік Қа­зақстан облыстарындағы жол құрылысы нысандарының қазіргі таңдағы жағдайын сараптан өткізді. Мәселен, “Нұр Отан” ХДП Пар­тиялық бақылау комитетінің төр­ағасы Боран Рахымбеков өз сөзінде егер алдыңғы 3 айда көбінесе еңбек заңнамасы саласындағы заң бұзу­шылықтар жөнінде айтылып келсе, ендігі кезекте партиялық бақылау бөлімшелерінің барлығы құрылыс жұмыстарының сапасына айрықша мән бермек, деді. Ал “Нұр Отан” ХДП-ның еліміз Үкі­метіндегі арнайы өкілі, сарап­тама тобының жетекшісі Владимир Дворецкий еліміздің Көлік және коммуникация министрлігі комис­сия ұсынымдарының басым көп­шілігін жүйелі орындағанын атап өтті. Оларға жергілікті әлеуметтік-кәсіпкерлік корпорацияларды атал­ған жобаның жүзеге асырылуына тарту, Ақтөбе және Хромтау жер­леріндегі айналма жолдар құры­лыстарын жобалау, жүк мәшине­лерінің жүк салмағын бақылауды қамтамасыз ету секілді іс-шара­ларды жатқызуға болады. Десек те, басқосуда әлі де көп­теген өзекті мәселелердің күн тәр­тібінде тұрғандығына көз жет­кі­зіл­ді. Мәселен, салаға қажетті отан­дық мамандардың жетіспеушілігі, мердігерлердің Қазақстанның еңбек заңнамасы мен келісім-шарт мін­деттемелерін дұрыс орындамауы, құ­рылысқа қатысты өзге де ол­қы­лықтардың орын алуы – комиссия жұмысын әлі де ширата түсуді талап етпек. Отырыс соңында бірқатар ұсынымдарға негізделген қаулы қабылданды. Олар еліміздің Көлік және коммуникация министрігіне, жоғарыда аталған облыстар әкім­дігіне және Үкіметке жіберілетін болды. Ләйла ЕДІЛҚЫЗЫ.