Қайта түлеген Қызылағаш

ел бірлігі мен мемлекет қамқорлығын айқын сезінді “Су – өмірдің нәрі” деген ғой. Десек те биылғы көктемнің қара суы­ғын­да табиғаттың тосын мінез танытуынан бөгендегі тұнық су кемерінен асып, жол-жөнекей алып темір құбырларды ағызса, бейқам тірліктегі ауыл халқын әбігерге салды. Қызылағаштықтар бір түнде көз көріп, құлақ естімеген алапат су тасқынының астында қалып, әке-шеше баласынан, туған-туыстарынан айырылып, көңіл мұңға, көздері жасқа толды. Елбасы Нұрсұлтан Назарбаев­тың су тасқыны зардаптарын жою мен тірлікті қалпына кел­тіруге қатысты жедел тапсыр­ма­сынан кейін барша қазақстан­дықтар бір жағадан бас, бір жең­нен қол шығарып, жұмыла кі­рісті. Үкімет басшысының қада­ғалауы, облыс әкімінің жетек­шілігімен құрылған комиссия жүр­гізген барлық жұ­мыстардың тиянақты аяқталғаны­на да айға жуық уақыт болды. Жер жаннаты Жетісуға жұмыс сапарымен тамыз айының ал­ғаш­қы аптасында келген Мемлекет басшысы тасқыннан кейінгі Қы­зыл­ағашта атқарылған жұмыстарға жо­ғары бағасын беріп, тұрғын­дар­ды бірлік пен тірлікке, тұшымды еңбекке шақырғанын ешкім ұмыт­қан жоқ. Айтылған сөзге ұйыған олар, әр күндерін игілікті іске арнап келеді. Қазіргі кезде қызылағаштықтар мамыражай өмірлерін жалғасты­рып, сәнді үйлерде ғұмыр кешіп, қораларынан төрт түлік мал өріп, өздеріне жасалған тұрмыстық жағдайлардың қызығына кенелген. Қандай да бір басталған істің қорытындысы болатыны анық. Күні кеше Қызылағаштағы сал­танатты мәдениет сарайында елді мекендердегі су тасқынының зардаптарын жою мен қалпына кел­тіруге байланысты жұмысшы­ларды үйлестірген жедел штабтың қорытынды жиыны өтіп, облыс әкімі Серік Үмбетов халықтың басына түскен қайғысын бөлісіп, қайнаған жұмыстың ортасынан табылып, қысқа мерзімде ауылды қайта түлеткен құрыш қолды құрылысшыларды, тағы басқа сала бас­шы­лары мен мамандарын алғыс хат, құрмет грамоталарымен марапаттады. Олардың қатарында қиын кезде елді мекендегі орын алған жағдайды жалпы халыққа жеткізіп, шынайы ақпарат таратқан БАҚ ұжымдары болса, еліміздің бас газетінің ұжымына да осындай құрмет көрсетілді. Осы күні мәдениет сарайындағы жұрт­шылық алдында облыс әкімі Серік Үм­бетов, бірінші орынбасары, жедел штаб жетекшісі Амандық Баталов наурыз айын­дағы табиғат апаты кезінде кездескен қиындықтарды және содан бергі басқа түскен ауыртпалықты сейілтудегі шыдам­дылық шыңдалған сәттерді еске түсіріп, “Қайғы бөліскенде ғана жеңіл­дейтінін” ортаға салды. Ауылдар су астында қалғанда өңірдегі қыз­­­мет салаларындағы жауаптылар тұр­ғындарды құтқаруға жұмылдырылды. Осы орайда облыстық ішкі істер, төтенше жағ­дай­лар жөніндегі басқарма, Талдықорған әскери бөлімдерінің сарбаздары асқан жанқиярлық танытқанын айтқан жөн. Ал құрылыс компаниялары құжаттары әзір­лен­генше бір жарым ай бойы өз қаржы­лары­мен жұмыс істеп, осы мерзімде 45 үй­ді пайдалануға берді. Осылайша қалпы­на келтіру жұмыстары 4 айда толық аяқ­талып, Қызылағашта 465 үй жаңадан са­лын­са, 30 үй мен 9 әлеуметтік нысан ғи­марат­тары жөндеуден өтті. Бір ауыл қайта түлеп, әсем келбетке ие болды. Ауылдағы ұшан-теңіз жұмыстардың тиянағын кел­тіріп, күн-түн демей оның басы-қасы­нан табылған Амандық Ғаббас­ұлының өлшеу­сіз еңбегін облыс әкімі осы күні ерекше айтты. Бүкіл ел Қызылағашқа қайырым­ды­лық көмектерін жөнелтсе, ардагерлер зейнетақысын аударды. Тұрғындардың қайғысын бөлісіп, қолұшын беруден еш адам шет қалмады. Бүгін сіздердің және өзімнің атымнан баршаға алғыс айтамын. Мәселен, апаттан зардап шеккен тұр­ғын­дарға 3 ай бойы 15 мың теңгеден ма­те­риал­дық көмек көрсетуге республикалық бюджеттен 145,3 млн. теңге бөлініп, 3310 тұрғынның дербес есептеріне қаржы ау­да­рылды. Мемлекеттің материалдық ре­зер­ві мен қайырымдылық ұйымдарынан 245,3 млн.теңгенің азық-түлігі мен зат­тары келіп түсті. Осындағы жоғары оқу орындары мен колледждерде оқитын 70 балаға облыс әкімінің гранты берілсе, басқа да әлеуметтік-тұрмыстық жағдай­ларды жүзеге асырғандарға алғыс айтқан жөн. Бүгінгі жедел штабтың соңғы оты­рысын Қызылағашта аяқтап, су тасқыны­нан кейін оның зардаптарын жоюға жұмыла кіріскендерді марапаттауды жөн көрдік, деді Серік Әбікенұлы. Қорытынды жиында облыс әкімінің бірінші орынбасары Амандық Баталов, Ақсу ауданының әкімі Әскербек Дүйсем­баев қиындығы батпандай болған 4 айдағы көңілде жүрген ой тұжырым­дарын ортаға салса, ауыл әкімінің міндетін атқарушы Сәуле Амитова, жас ұстаз Құ­ра­лай Байгелдиева, тағы басқалары жер­лестері атынан қиын кезде қолұшын бер­гендерге алғыстарын жеткізіп, тебіренді. Су тасқыны зардаптарын жою мен қалпына келтірудегі еселі еңбектері үшін осы күні түрлі сала қызметкерлері, тәртіп сақшылары мен жауынгерлер, қатардағы жұмысшы, құрылысшы, ауыл белсенділері облыс әкімінің, аудан әкімінің құрмет гра­моталарымен марапатталып, еңбек­терінің өтеуін көрді. Жиналғандарға ән мен күйден шашу шашылса, апат кезінде бақилық болған әруақтарға құран бағышталып, ас берілді. Әжелер шашуын шашып, мәре-сәре болып, Қызылағашта енді той-мереке болсын деген ақ тілекпен тарасты. Күмісжан БАЙЖАН. Алматы облысы.