«Green House – Зеленый дом»

Голландиялық раушан гүлдерімен қатар «ҚазАгроҚаржы» акционерлік қоғамының қаржыландыруымен 4 гектарға жылыжай салуда Гүл – әсемдік пен сұлулықтың, нә­зіктіктің символы. Өмірге нәресте келіп, адам өміріндегі қуанышты сәттерде де гүл сыйлап, оған ортақтасамыз. Демек, ол бір-бірімізге деген ізгі ниет-пейілдің, жан-жылуының белгісі. Жаз айларында даланы көмкерген қызғалдақ, сарғалдақ көңіліңді көтереді, жұпар иісі жан сезіміңді елітеді. Гүл – өмір, гүл – қуаныш, гүл – махаббат нышаны дейтініміз сондықтан. Осындай се­зімге бөленуімізге Текелі қаласының ба­ты­сындағы жылыжай табалдырығын атта­ғанда жұпар ауасы жан сарайымызды аш­қан раушан гүлінің қызыл, ақ, сары, ал­қызыл түстері бірінің әсемдігін бірі то­лық­тырып, көз қызықтырды. Мұнда жанға жай­лы, толқынды музыка әуені құйылып тұр. Жауқазын гүл арасында өрімдей қара көз қыздар сабақтағы артық бүршіктерді ал­ып, күту жұмыстарын жалғастыруда екен. «Green House– Зеленый дом» жауапкершілігі шектеулі серіктестігінің өндірістік басқарушы директоры Оксана Косенко раушан гүлін өсірудегі біз біле бермейтін жайларды әңгімеледі. – Серіктестік 2008 жылы гүл өсіруді қолға алды. Бұған дейін жылыжайда қы­занақ, қияр өсірілген екен. Жылыжай кешенін сатып алғаннан кейін қайта жаб­дықтап, Голландияның «Bulneth» фирма­сы­нан шикізат, құрал-жабдық әкелінді. Өйт­кені, голлан­дықтар жүз жылдан бері жы­лы­жайларда раушан гүлін өсіретін әлемдегі іргелі компания ретінде танылған. Соңғы жылдары олар­дың қатысуымен Ресей мен Украинада жылыжай өндірісі дамыған. Енді міне, Текелі қаласында раушан гүлінің 4 түрі өсіріліп, 43 адам жұмысқа тартылды. Оқу-тә­жі­рибеден өткендер гүлді күту, кесу, тағы басқа жұмыстармен айналысады, – деді. Жылыжай ішінде электр шамдары жар­қырап тұр. Сазды әуен, қыздардың көңілді кейпі де раушан гүлі қауызының ашы­луына, бүршік жаруына өзіндік әсері бар екенін де Оксана тәптіштеп жеткізді. Гүл сезімтал. Оны қоректендіру, тамшылата суарумен бірге жүрек жылуы, қоршаған ор­тадағы таза ауа қажет. «Green House – Зеленый дом» серіктестігін «ҚазАгроҚаржы» акционерлік қоға­мы­ның қаржыландыруымен қосымша 4 гек­тар­ға жылыжай салып, өндірісті дамыту қол­ға алыныпты. Бұл жөнінде аталған қо­ғамның облыстағы директоры Ержан Устаев айтып өтті. Жылы­жай­дағы барлық құ­рас­тыру жұмыста­ры аяқталуға жақын. Елі­міздегі аг­рарлық саланы дамыту бағ­дарла­ма­сымен қолға алынған «Қаз­­Агро­­Қаржы» қоғамы ұлттық қор есебінен жылыжай құрылысына 1170 895 195,88 теңге несие беріпті. Аталған қар­жы құрылыс жұмыстары мен жы­лы­жайды электр қуатымен жабдық­тау­ға жұмсалып, несиені қайтаруда едәуір же­ңіл­дік жасалғанын атап айтуға болады. Несие қаржыны өтеуді серіктестік екі жыл­дан кейін ғана бас­тайды. Осы аралықта өн­дірісті дамытып, экономикалық белсенділігін жақсартуына мүмкіндік туа­ды. Содан соң несиені қай­тару бел­гілі пайыздық мөл­шер­де жүргі­зі­леді. Ал құрал-жаб­дық, тех­ника лизинг бой­ынша өтеле­тіні де өн­дірістің қалыпты дамуына жол аша­тыны тү­сінікті жайт. Голландиялық раушан гүлдері кү­ніне екі мезгіл таңертең және түстен кейін қауызы сәл ашылған кезде кесіліп, жина­лады. Гүл дестелері артық са­бақтарының арылып, екі сағат суда тұр­ған соң, ар­найы тоңазытқышқа қо­йы­лады. Тұтыну­шы­ның сұраны­сы­на бай­ланысты одан әрі саудаға жөнелтіледі. Бүгінгі күні Текелінің қызыл, ақ, сары, алқызыл раушан гүлдері Астана, Алматы, Қарағанды қалаларымен қатар Талдықорғандағы халық қаже­тіне жарап, адамдардың күнделікті қуанышы мен бақытының белгісіндей көңілдерге шуақ шашуда. – Нарықтың қатал заңдылығын нә­зік гүл өсірумен жеңуге де болады, – дейді Оксана одан әрі әңгімесінде. – Шыққан шығынның орны жабылып табыспен қо­рытындылануда. Серіктестікте бар­лы­­ғы 60 адам еңбек етсе, жалақылары да жақсы. Жұмысшылар арнайы авто­кө­лікпен тасымалданып, екі мезгіл тегін тамақтандырылады. Денсау­лық­тарын түзеуіне де көңіл бөлінген. Иә, «Green House-Зеленый дом» өс­ірген миллиондаған алқызыл раушан гүлде­рі талай-талай жандарға жан жылуын сый­лай­тыны анық. Ал енді жұ­мы­сын бастай­тын жылыжайдағы көкөніс-қы­за­нақ пен қияр дастарқан мәзірін, адам ағза­сын қажет­ті дә­ру­мендермен байытып, ден­саулықтың ны­­ғаюына жол ашады. Осы­лай­ша «Қаз­Агро­Қаржы» акционерлік қоға­мы­ның қар­жы­лан­дыруы нәтижесінде текелілік тұрғын­дар та­ғы да қосымша жұмыс орны­мен қам­ты­латын болса, өндірісті өркен­де­ту­ге де мүм­кіндік туған. Бұл Елбасының Жол­дау­ындағы тап­сыр­малардың жүзеге асуы­ның айқын дәлелі. Күмісжан БАЙЖАН. Алматы облысы. ----------------------------------------- Суреттерде: жылыжайдағы жұмыс сәтінен.