Әкелер ерлігін құрметтеу – парыз

Жеңістің 65 жылдық құрметіне орай «Нұр Отан» ХДП мен «Единая Россия» ЖРСП бірлесіп, Ұлы Отан соғысы жылдарында қа­за болған жауынгерлерді мәңгі есте қалдыруға бағытталған кең ау­қым­ды патриоттық жобаны жүзеге асыруда. Жобаға Қазақстан Рес­публикасының Ресей Федерациясындағы елшілігі, «Қазақстан те­мір жолы» Ұлттық компаниясы, ҚР Қорғаныс министрлігі, Ақ­төбе облыстық әкімдігі қолдау көрсетті. Жоба аясында құрамына, Ржевте 100-ші және 101-ші жеке атқыштар бри­гадасында соғысқа қатысқан ҰОС ардагерлері, осы қанды шай­қас­та қаза бол­ған­дардың туыстары, ло­каль­ды со­ғыс ар­дагерлері, сондай-ақ, жас қа­зақ­стан­­дық өкілдер кірген па­триот­тық «Же­­ңіс пойызы» ұйым­дас­ты­рылды. 7 желтоқсанда Алматыдан ат­тан­­ған пойыз Тараз, Шымкент, Қы­зыл­­орда, Ақтөбе, Орал қалаларын ба­сып өтіп, 11 желтоқсанда Мәскеу қа­ла­сы­ның Қазан вокзалына аял­да­ды. Әрбір стансада айрықша пойыз­дың жолау­шы­ларын құшақ жая қар­сы алып, ыс­тық лебіздерін арнады. Және Ржевте соғысқа қатысқан 100-ші және 101-ші дербес атқыштар бри­гадасы жауынгер­ле­ріне ашыл­ған мемориалдық кешенге арнайы капсуламен жеткізілу үшін Қазақ­стан жерінен алынған бір уыс то­пырақ осы қуанышты еселей түсті. Өйткені, Жеңіс пойызының соң­­­ғы аялдамасы да дәл осы Ржев қа­­ла­сы болатын. Ұрыстың стратегиялық маңыз­ды­­­лы­ғы турасында неміс генера­лы­ның осы уақытқа дейін сақталып кел­ген мы­надай сөзі бар: «Ржев – бұл трам­плин. Уақыты келгенде біз осын­нан Мәскеуге секіріс жа­сай­мыз». Алайда, Отанын қорғау жо­лын­да отқа түскен батыр­ла­ры­мыз­дың арқасында немістерге ондай уа­қыт тумады. Есесіне Ржев Мәскеуге секіріс жасайтын трам­плиннен гөрі, «кеңестер үшін Бер­линге жол аш­қан» серіппеге айналды. 100-ші және 101-ші дербес ат­қыш­тар бригадасына 13 мыңнан ас­там қазақстандық біріккен еді. Сол бір кездің құрметіне Ржевте Ме­мо­риал­дық кешен ашылды. Қа­зақ­стан мен Ресей басшыларының тап­сыр­масы бойынша Мемориал­ды тұр­ғы­зу үшін барлық жағдай жасалды. Ескерткіштің ашылу салтана­тын­да сөз алған партия Төраға­сы­ның бірінші орынбасары Нұрлан Нығ­ма­тулин: «Елбасымыз, партия­мыз­дың Төр­ағасы Нұрсұлтан Әбіш­ұлы На­зар­баев айтқандай, «біз жеңімпаз әкелердің ұрпа­ғы­мыз». Олардың өш­пес ерлігін, па­триоттық сезімін, биік рухын құр­мет­теу және одан үлгі алу, ол деген, біздің парызымыз. Сон­дық­тан, Президен­тіміздің тапсырмасына сәй­­кес «Нұр Отан» партиясы көп­те­ген шаралар­ды жүзеге асыруда. Ал бү­гінгі ашыл­ған осы ескерткіш сол ба­тыр­лардың мәңгі есте қа­луы­ның тағы бір белгісі деп білеміз», – деді. Арада көптеген жылдар өтсе де, сол бір қайғылы сәт әлі де ешкімді бей-жай қалдырмай, талай­дың жү­ре­гін ауыртып, жанын жа­ра­лауда. Сон­дық­тан естен кетпес сұрапыл жыл­дар­ды жас ұрпаққа жет­кізу өте маңызды. Акция аяқталды, бірақ ма­ңызды жұ­мыс өз жалғасын табады. Аталған тақырып, сондай-ақ «Нұр Отан» партиясы Төр­аға­сы­ның бірінші орынбасары Нұрлан Нығ­ма­тулиннің «Единая Россия» партия­сы­ның төрағасы Борис Грыз­ловпен кездесуінде талқыланды.