Күніне – 1 000-ға жуық хат

1991 жылғы желтоқсанның соңында Қазақстан Республикасы Министрлері Кабинетінің қаулысымен жоғары мемлекеттік билік және мемлекеттік басқару органдарын, үкіметтік мекемелер мен жоғары әскери қолбасшылықты фельдъегерлік байланыспен қамтамасыз ету үшін Қазақстан Республикасының Мемлекеттік фельдъегерлік қызметі құрылды. Сол уақыттан бастап Қа­зақ­стандағы әскери фельдъегерлік қызмет күн сайын басты міндетті орындауда. Яғни, Қорғаныс ми­нистрлігі мен Қазақстан Рес­публикасы Қарулы Күштерінің Бас штабының басшылық құрамын газеттер және журналдармен қам­тамасыз етеді. Ұлы Отан соғысы кезінде пош­таны оқ-дәріге теңестірген. Жақындары мен туған-туыс­қандарынан орлар мен тасаларға жеткізілген хаттар жауынгерлерге күш бітірді, жаумен айқасуда төтеп беруге көмектесті, жеңіске жігерлендірді, яғни көңілдерде үміт отын жақты. Заманауи фельдъегерлер олардың қызметі электрондық байланыс құралдарының дамуына қарамастан, әрқашан сұранысқа ие болатынын айтуда. Себебі, олар хаттарды мекенжайға дәл уақытында жеткізеді. Әр күн сайын таңсәріден бастап адресаттарға маңызды хат-хабарды, газеттер мен жур­налдардың жаңа нөмірлерін жеткізуге тиіс Қорғаныс минис­трлігінің экспедиторлары жұмыс­қа шығады. Олар поштаны қабыл­дайды, өңдейді, сұрыптайды, жинақтап, әрі қарай жіберуге аттанады. Күніне қабылдау, өңдеу, жеткізу қажет 1000-ға жуық хат, 50-ге тарта газет пен журнал келіп түседі. Экспедиторлар мен сұрып­таушылардың біршамасы әйел әскери қызметшілер екендігі қызықты жәйт. Фельдъегерлерге анағұрлым күрделі жұмыс жүктеледі. Ер әскери қызметшілер ауа райына қарамастан, гарнизон бойынша қажетті хат-хабарды жеткізеді. Хаттар мен пошта са­лынған қапшықтар өте ауыр болып келеді. Оның салмағы 70-80 келіден асып жығылады. Фельдъегерлік қызметтің «жа­рағындағы» маңызды керек-жарақтың бірі – франкировальді машина. Ол пошта байланысы қызметтерінің төленуін растайтын жазбаша хат-хабарға пош­та төлемінің мемлекеттік бел­гілерін нақыштау, аталған хат-хабардың және өзге де ақпараттың қабылданған күнін белгілеуге ар­налған. Күн сайын өлшенгеннен кейін ол арқылы барлық кіріс хат-хабар өтеді. «Қазіргі телефон, телеграф және радиобайланыстың, ғалам­тордың қарыштап дамыған кезінде фельдъегерлік қызмет мүлдем қажетсіз көрінуі мүмкін. Бірақ, бұл – жаңсақ пікір. Маңызды құжат­тарды ғаламторға да, телефонға да сеніп тапсыра алмайсың. Тек сенімді, тиянақты, кез келген жағдайда және дәл уақытында жүкті құпия түрде жеткізу қабілетті адамдардың ғана қолынан келеді», – дейді фельдъегерлік-пошта қызметінің әскери қызметшілері. Осылайша, Қазақстан Рес­публикасы Қарулы Күштерінің фельдъегерлік қызметі күн сайын заманауи жүйелер мен уақыт талабымен тексерілген құралдарды қолдана отырып, сенімді және үздіксіз байланысты қамтамасыз етеді. Сәулебек БІРЖАН.