Дәулет еңбекпен келеді

Ауыл жұртшылығы да «Бес институттық реформаны жү­зеге асыру бойынша 100 нақ­ты қадам» Ұлт Жоспарында бел­­гі­ленген қағидаттарды экономиканы одан әрі дамытудың, қо­ғамды ізгілендірудің, жаңа құ­қықтық орта қалыптастырудың кең ауқымды жасампаздық бағ­дарламасы ретінде қабыл алып, өркениетті 30 елдің қатарына қо­сылудың серпінді қадамына бағалап отыр. Бес институттық реформаның негізі заңнамалық және ұйымдастыру тұрғысынан қамтамасыз етілгені баршаға аян. Ендігі мақсат экономикалық өсім қарқынын сақтай отырып, берік әлеуметтік кепілдіктер иеле­не алатын практикалық шаралар­ды мүлтіксіз жүзеге асыру болмақ. Сол себепті де, жергілікті билік орындары бес реформаның әр­қай­сысы бойынша нақты іс-қи­мылдар белгілеп, дәйектілікпен орындаудың қам-қарекетіне қызу кірісіп кеткен. Өйткені, Тәуелсіз Қазақстанның таяу жылдардағы өркендеу бел-белестерін нақты айқындап берген Елбасының сындарлы саясаты жарқын болашақ үшін аянбай қызмет етуге міндет­тейді. Нұрсұлтан Әбішұлы атап өткендей, әрбір тұрғын Ұлт Жос­парын жүзеге асыруға және рефор­маларды жүргізуге барынша бел­сендірек қатысса, олар ашатын мүмкіндіктерді тиімді пайдаланса, қазақстандық арманымыздың орындалуына, Қазақстанның одан арғы өркендеуіне қол жеткізеріміз анық. Қазақстандықтардың біртұтас­тығын діттейтін реформалар табыс­тылығын туған жері – тұғырым, өскен елін өмірім деп санайтын шал­ақындықтар өмірінен де көп­теп келтіруге болады. Аудан облыс орталығынан шалғай орналас­қанына қарамастан жарқын болашақ жолында зор қарқынмен, ерен қажыр-қайратпен еңбек етіп келеді. Тек былтырдың өзінде 134 шағын және орта бизнес субъектілері тіркелді. «Бизнестің жол картасы-2020» бағдарламасы шеңберінде 142,5 миллион теңгенің 4 жобасы іске қосылды. Индустрияландыру кар­тасы аясында жаңа жұмыс орындары құрылды. Бөлшек тауар айналымы 2426,9 миллион теңгені құрады. Елбасының бюрократтық шығынсыз экономикаға қадам ба­су талаптарын ауылшаруашылық тауар өндірушілері мемлекеттің кәсіпкерлікпен өзара қарым-қаты­насының жаңа қағидаттық көрінісі ретінде қуаттады. Мұның өзі фер­мерлік пен бүкіл аграрлық секторды ілгерілетудің ынталандыру тетіктерін қалыптастырары анық. 58 ЖШС, 186 шаруа қожалығы мен фермерлік бірлестіктер 349,1 мың гектар алқапқа астық , 17,8 мың бас ірі қара мал, 6,2 мың бас жылқы өсіреді. «Ірі қара етінің экспорттық әлеуетін арттыру» бағдарламасы бойынша 1124 бас мал сатып алынды. «Сыбаға», «Құлан», «Алтын асық» бағдарламалары шеңберінде көрсетіліп жатқан жеңілдік шаралары аз емес. Ұлт Жоспарында білім беру, денсаулық сақтау және халықты әлеуметтік қорғау салаларын ре­формалау арқылы адамдарға әлеу­меттік көмек көрсету жүйесін оңтайландыру, сапасын күшейту жан-жақты қарастырылған. Қа­зақстандықтар үшін өзекті са­налатын тұрғын үй мәселесін шешу барлық өңірлерде айрықша басымдыққа ие. Өткен жылы ауданда 2150 шаршы метр тұрғын үй пайдалануға берілді. 3 пен 6 жас аралығындағы бүлдіршіндер үшін мектепке дейінгі тәрбие меке­мелерімен қамту толық шешіл­ген. Барлық білім ошақтары интернет желісіне қосылған. 24 дәрігер, 145 орта буын медицина қызметкерлері науқас жандарға қызмет көрсетеді. Онкологиялық аурулармен сырқаттану көрсеткішінің төмендегені байқалады. Десек те, жоғары білімді мамандарға деген тапшылық сезілмей қалмайды. Әсіресе, оториноларинголог, офтальмолог, невропатолог, эндо­кринолог секілді мамандар тапшы. Меніңше, мемлекеттік индус­триялық-инновациялық даму жобалары бойынша кадрлар даярлау деңгейін арттыру шараларының қабылдануы тұрғындардың ден­саулығын сақтау саласында бір­қатар міндеттерді шешері сөзсіз. Медициналық мекемелерде бас­қарудың корпоративтік моделін ен­гізу жайының қарастырылуы да құп­тарлық. Осыдан ширек ғасыр бұрын экономикалық, әлеуметтік жағ­дайымыз, психологиялық көңіл-күйіміз қандай еді? Барлығы күні кешегідей көз алдымызда. Тәуел­сіздіктің арайлы ақ таңы жар­қырай атқан тұста біраз қиын­дықтарды бастан өткергеніміз рас. Жігері жасымаған, қайраты мұ­қалмаған халықпен не көрсе де бірге көріп, бірге жасасқан Президентіміз күрмеуі қиын мәселелерді тиянақ­тылықпен, дәйектілікпен шеше біл­ді. Білім, ғылым, денсаулық салалары жетілдіріліп, жастардың сапалы білім алуына жағдай жасалды. Әлеуметтік-экономика­лық көрсеткіштердің жақсару­ы­на сындарлы стратегиялық жос­пар құрылды. Оның жалғасы ретінде Ұлт Жоспары жасалып, қа­зақстандық біртекті қоғамды жарастырудың, жасампаздық ұлы істерге жұмылдырудың озық идея­сы, түп қазығы ретінде алға тартылды. Барша қазақстандықтардың береке-бірлігінің арқасында жұ­дырықтай жұмылып, Елбасы жүк­теген міндеттерді абыроймен ат­қа­руымыз – болашаққа деген зор сенімнің бірден-бір дәлелі. Мұнай бағасы құлдырап, экономикалық қиындық төнсе де, дағдарыс біз үшін таңсық емес. Осыдан 8 жыл бұрын да дәл осындай жағдайды бастан өткеріп, реформалардың табысты жүргізілуі арқасында қиын­дықтарды еңсере білгенімізді ұмыта қойған жоқпыз. Елбасы әлеуметтік қолдау шаралары бәсеңсімейтінін атап айтты. Биылдан бастап бюджет саласы қызметкерлерінің жалақысы, студенттер шәкіртақысы, зейнетақы өсіріліп, әлеуметтік жаңғыртулар жалғастырылды. Сала мамандарына ғана емес, күнкөріс деңгейі төмен отбасылардың тұрмыс жағ­­дайын жақсарту да пәрменді қолдау тапты. Біз өз тарапымыздан жаңа жұмыс орындарын ашуды, жұмыссыздықты азайтуды назарда ұстаудамыз. Былтыр 1208 адам тұрақты жұмысқа орналастырылды. Елбасы өз Жолдауларында Жалпыға Ортақ Еңбек Қоғамы идея­сын табанды түрде енгізуді үнемі айтып келеді. Дағдарыстан аман-есен шығудың бірден-бір кепілі қоғамдық пайдалы еңбек болмақ. Әркімнің өз саласы, өз ісі бойынша сапалы жұмыс атқарып, кәсіби жағынан шыңдалғанын, төсел­генін көрсете білсе, әсіресе, жастар күнделікті өмірлерінде кәдеге асатын арқаулық еңбек дағ­­дыларын қалыптастыруға зор мүмкіндік алар еді. Барлықтың, байлықтың, дәулет­тің тек еңбекпен, маңдай термен келетінін Елбасының «еңбек – бәрін де жеңбек» деген сөзімен түйіндегім келеді. Еңбек ИСИН, Шал ақын ауданы әкімінің орынбасары. Солтүстік Қазақстан облысы.