Солтүстік Қазақстанда анасы баласы үшін жазаланатын болды

ПЕТРОПАВЛ. 1 ақпан. Солтүстік Қазақстан облысында анасы баласының тәрбиесі мен оқуына салғырт қарағаны үшін 14 847 теңге көлемінде айыппұл төлеуіне тура келеді. Бұл туралы облыстық соттың баспасөз қызметіне сілтеме жасаған egemen тілшісі хабарлады. Петропавл қаласының тұрғыны өзінің ата-аналық міндетін босаңсытып алғанын мойындап, алдағы уақытта мұндай ағаттықтарға жол берілмейтініне сендіргенімен, кәмелетке толмағандар ісі жөніндегі мамандандырылған ауданаралық сот оған әкімшілік жаза тағайындауды жөн деп тапты. Құрылыс-экономикалық колледжінде оқитын оның ұлы оқуға деген құлқының жоғын сылтауратып, былтырғы жылдың желтоқсан айында ғана 21 күн сабаққа келмей қалған. Студенттің анасы Әкімшілік кодекстің 127-бабы бойынша кінәлі деп танылып, айыппұл төлеу жазасына тартылды. Өмір Есқали. Дерек: Солтүстік Қазақстан облыстық сотының баспасөз қызметі. Сурет: odessit.ua.