Автобус жүргізушісі әрі жас, әрі мас...

Әрине, қала ішіндегі дың жүргізушіден құжат сұрамақ түгілі түріне де үңіліп қара­май­тыны о бастан белгілі. Кө­ше бойында тұрған МАИ қызметкерлері де аузы-мұр­нынан шығып, ыңыранып бара жатқан автобустарды тоқтатып, құжатын тексеруді артық шаруа көреді. Содан болар қала ішінде жүйткіп жүрген автобустардың шопырлары тіптен еркінсіп кетіпті. Небәрі үш-ақ күнде өткен республикалық «Автобус» жедел-профилактикалық іс-шарасында Тараз қалалық ІІД жол-патрульдік қызметі №37 бағыт бойынша жолаушы тасымалдап жүрген автобустың екі жүргізушісін ұстады. Тараз қалалық ІІД жол-патрульдік қызметі ба­тальонының ко­ман­дирі, полиция майоры Ба­қытжан Жолдасбековтің айтуына қарағанда, «Саяхат-99» ЖШС-не тиесілі бұл автобус жүргізушісінің жолдама қағаздары осы бағытқа сәйкес келмегені былай тұрсын, көліктің осы түрін жүргізуге ешқандай құжаттары болмай шығыпты. Ең сұмдығы, өзін өте дөрекі ұстаған 20 жастағы жүргізушіні медициналық тексеруден өткізгенде дә­рігерлер оған есірткіге елті­ген деген қорытынды берген. Сонда бұл мекеме басшылары үшін автобус толы жолаушылардың тағдыры бір тиын болғаны ма? Ертеңінде тағы да 27 жас­тағы автобус жүргізушісі ұсталды. Оның да көлік жүр­гізуге құқық беретін еш­қан­дай құжаттары болмай шықты. Жергілікті полиция қыз­­метінің мәліметіне қа­рағанда, осы «Автобус» іс-шарасы ке­зінде 649 жол ережесін бұзу фактілері анық­талыпты. Оның ішінде жүргізушінің рөлде кетіп бара жатып ұялы телефонмен сөйлесуі, жол бойында қауіпті маневр жасау және жылдамдықты арттыруы өте көп кездескен. Осы тұста тағы бір айтары, жыл басынан бері Жамбыл облысында орын алған жол-көлік оқиғаларының тоғызында кінәлі жақ оқиға орнынан қашып кетіпті. Оралхан ДӘУІТ, «Егемен Қазақстан». Жамбыл облысы.