Партия бақылауындағы бағдарлама

Мемлекет басшысы Н.Ә.Назарбаев «Нұрлы Жол – болашаққа бастар жол» атты халыққа Жолдауында Ұлттық қордан 2015-2017 жылдарға дейінгі кезеңге жыл сайын қосымша 3 миллиард долларға дейін бөлу жөнінде шешім қабылдаған болатын. Сондай-ақ, бұл жұмыстарға белсене араласып, барлық деңгейлерде қатаң партиялық бақылау орнатуды «Нұр Отан» партиясына тапсырған еді. Елбасы жүктеген міндеттерді жүзеге асыру мақсатында Маң­ғыстау облысында әлеуметтік нысандар салу үшін Ұлттық қордан үлкен көлемде қаржы құйылды. Осы орайда, Маңғыстау облыстық мәслихатындағы «Нұр Отан» партиясының депутаттық фракциясы жанындағы мемлекеттік бюджет қаражаты мен Ұлттық қордан бөлінген қаржылардың мақсатты және тиімді пайдаланылуын бақылау комиссиясы Ақтау қаласында салынған нысандарға тексеру жүргізу жұмыстарын бас­тады. Комиссия мүшелері алдымен Ақтаудағы «Жаңа шағын аудандардың кәріздік тарату жүйесінің құрылысы» жобасымен танысты. Бұл, атауы айтып тұрғандай-ақ, қанатын кеңге жа­йып келе жатқан Ақтау қаласының жаңадан салынған және салынатын ондаған шағын аудандарына қажетті инфрақұрылымдық қыз­мет­ке орайластырылған жоба. Құны 1 101 978,0 мың теңге тұра­тын бұл жоба үшін 2015 жылы еліміздің Ұлттық қорынан мақсат­ты трансферт есебінен 1 067 391,0 мың теңге бөлінген. Қазіргі таңда кәріздік құбырлар тарта­тын жыралар қазылып, жұмыс қалыпты жүруде. «Нұрлы Жол» бағдарламасы бойынша салынған жаңа 32 «а» шағын ауданындағы 120 пәтерлік тұрғын үйдің салынуы мен пайдалануға берілуі туралы комиссия мүшелеріне Ақтау қаласы әкімінің орынбасары Ө.Бисақаев баяндады. «Қолжетімді тұрғын үй-2020» бағдарламасы аясында салынған жайлылығы жөнінен 3 сыныпты үйлердің құрылысы аяқталып, өз иелерін күтіп тұр. Құны 1 322 625,0 мың теңгені құраған баспана құрылысы кезекте тұрған азаматтарға берілмек. – Құрылыс нысандарын ара­лауға құрылған комиссия құра­мында «Нұр Отан» фракция­сынан үш депутат және арнайы мамандар бар. Біз осы тексеру жұмыстарына қатысты арнайы кесте түзген болатынбыз, осы кес­те бойынша мезгілінде тексеруге шығып тұрамыз. Қайсы құрылыс нысанында қаржы жетіспеушілігі бар, көзге көрініп тұрған қандай кемшіліктер бар – осының бәрін біз қадағалап, дер кезінде шешім алып, жолға қоюға жұмыс жасап келеміз, дейді «Нұрлы Жол» бағдарламасының жүзеге асуын қадағалау бойынша «Нұр Отан» партиясы жанынан құрылған комиссияның мүшесі, Маңғыстау облыстық мәслихатының депутаты, «Қаламқасмұнайгаз» ӨБ басшысы Нұрпейіс Сәрсенбай. Депутаттардың тексеру жұ­мыс­тары жалғасын таба бермек. Гүлайым ШЫНТЕМІРҚЫЗЫ, «Егемен Қазақстан». Маңғыстау облысы.