«Айгүл» ансамблінің әншісі Галина Қарамолдаева 70 жасқа толды

АЛМАТЫ. 22 ақпан. Қазақ мемлекеттік қыздар педагогикалық университеті өткен ғасырдың жетпісінші жылдары аты дүркіреп шыққан «Айгүл» вокалды-аспаптық ансамблінің әншісі, ұлағатты ұстаз Галина Қарамолдаеваның 70 жылдық мерейтойы мен ұстаздық қызметінің 50 жылдығын атап өтті. Бұл туралы egemen.kz тілшісі хабарлады. Қыздар университетінде өткен айтулы шараға Мұхтар Әуезов атындағы академиялық драма театрының әртістері мен Темірбек Жүргенов атындағы Өнер академиясының студенттері де қосылды. «Айгүл» вокалды-аспаптық ансамбілінің мүшесі Галина Қарамолдаева құраммен бірге «Гүлдерайым», «Тек қана қыздар», «Қамажай», «Қаракөзайым», «Алматының алмасы», «Бәрінен де сен сұлу» сынды әдемі әндерді шарықтата шырқаған. Кезінде ансамбль қыздарының есімдері республикаға танымал болуымен қатар, өзге елдерге де бірнеше мәрте гастрольдік сапармен барған. Сонымен қатар, Галина Қарамолдаева мен ансамбль құрамындағы Ағайша Исағұлова екеуі жұп болып, «Қос қарлығаш» деген атпен халық жүрегінен орын алды. Өз кезінде жоғары бағаға ие болған бұл ансамбльдің бүгінде аты алтын әріптермен сақтаулы. Айнаш Есали. Дерек, сурет: egemen.kz.