Құқық қорғау органдары академиясы кадр даярлау ісіне ерекше көңіл бөлуде

АСТАНА. 22 ақпан. Бас прокуратура жанындағы құқық қорғау органдары академиясы және Мемлекеттік қызмет саласындағы аймақтық хаб арасында ынтымақтастық жөніндегі меморандумға қол қойылды. Бұл туралы Бас прокуратура жанындағы Құқық қорғау органдары академиясының баспасөз қызметіне сілтеме жасаған egemen.kz тілшісі хабарлады. Аталған академияның ректоры Ұлан Байжанов пен Астана қаласындағы Мемлекеттік қызмет саласындағы аймақтық хаб басқарушы комитетінің төрағасы Әлихан Бәйменовтің ресми кездесуі өтті. Кездесу барысында Ұлан Байжанов құқық қорғау органдарының академиясы күш құрылымдарының кадрларын, оның ішінде президенттік резервті сапалы даярлау қажеттілігінен құрылғанын атап өтті. Осыған байланысты Мемлекеттік қызмет саласындағы аймақтық хабпен меморандумға қол қою бұл бағыттағы жемісті ынтымақтастықтың бастамасы болады. Әлихан Бәйменов алда тұрған ынтымақтастықтың маңыздылығын айта келіп, күш-жігерді біріктіру құқық қорғау жүйесі өкілдерін кәсіби даярлаудың сапалы деңгейін қамтамасыз етуге, сонымен қатар кешенді ғылыми қызметті жүргізуге көмектесетініне сенім білдірді. Кездесу нәтижесінде ынтымақтастық туралы меморандумға қол қойылды, оның шеңберінде тараптар құқық қорғау органдары қызметкерлерін оқытуға және құқық қорғау қызметінің көкейкесті мәселелері бойынша іргелі және қолданбалы сипаттағы бірлескен зерттеулер жүргізуге үйлестірілген күштерін бағыттайтын болады. Астана қаласындағы мемлекеттік қызмет саласындағы аймақтық хаб Қазақстан Үкіметінің және БҰҰ ДБ бастамасы бойынша 2013 жылы Астанада 25 мемлекеттің және 5 халықаралық ұйым өкілдерінің қатысуымен өткен құрылтай конференциясында құрылды. Хабтың міндеті аймақтағы мемлекеттік қызметтің тиімді жүйелерін дамытуға жағдай жасау болып табылады. Еламан Қоңыр. Дерек, сурет: Бас прокуратура жанындағы құқық қорғау органдары академиясының баспасөз қызметі.