Көкшетаудағы тоқыма-тігін кәсiпорны өндiрiс көлемiн ұлғайтуда

АҚМОЛА. 9 наурыз. Қаладағы «Арман» трикотаж кәсіпорны жауапкершілігі шектеулі серіктестігі өндіріс көлемін ұлғайта бастады. Бұл туралы Ақмола облысы әкімінің баспасөз қызметіне сілтеме жасаған egemen.kz тілшісі хабарлады. Кәсіпорын жеңіл өнеркәсіп саласында ұзақ мерзімнен бері жұмыс істеп келеді. Серіктестік директоры Татьяна Басанның айтуынша, ұжым 2014 жылы 20 миллион теңгенiң 6 мың дана өнiмiн шығарса, 2015 жылы 26 миллион теңгенiң 8 мың дана өнiмiн саудалаған. Көкшетаудағы бірегей өндіріс орнының арнайы әскери және мектеп формалары, өзге де тоқыма өнiмдерi Ақмола облысында ғана емес, Солтүстiк-Қазақстан облысында да ерекше сұранысқа ие. Бүгінде кәсіпорында өз ісіне берілген 30 адам еңбек етуде. Олардың орташа айлық жалақысы 80 мың теңгеден асады. Бақберген Амалбек. Дерек, сурет: облыс әкімінің баспасөз қызметі.