Ұлттық Олимпиадалық комитет пен «Қазақстан» РТРК меморандум жасасты

АСТАНА. 9 наурыз. Мәдениет және спорт министрі Арыстанбек Мұхамедиұлы, Ұлттық Олимпиадалық комитетінің бас хатшысы Данияр Әбілғазин және «Қазақстан» РТРК» АҚ басқарма төрайымы Нұржан Мұхамеджанова халық арасында спортты дамыту мен ілгерілету жөніндегі үшжақты меморандумға қол қойды. Бұл туралы egemen.kz тілшісі хабарлады. Меморандум шеңберінде Қазақстан Республикасында дене шынықтыру мен спортты, саламатты өмір салтын дамытуға арналған жұмыстарды бірігіп жасау, елімізде спортты дамыту, олимпиадалық қозғалысты, бұқаралық спорттық іс-шараларды телевидениеде насихаттау арқылы дамыту жоспарланып отыр. Сонымен бірге басым бағыт ретінде еліміздің олимпиадалық спорт түрлерінен ұлттық құрама командаларына баса назар аударылмақ. Меморандумда спортшылардың телевизиялық жобаларға, сараптамалық бағдарламалар, жаңалық сюжеттеріне қатысуын қамтамасыз ету қарастырылды. «Кazsport» телеарнасында жаңадан арнайы бағдарламалар (отбасылық, сауықтыру) ашу көзделген. Сондай-ақ әріптестік меморандумына сәйкес «Қазақстан» РТРК АҚ министрлік немесе ҰОК өткізетін спорттық шаралардың басты ақпараттық серіктесі болады. Дастан Кенжалин. Дерек: «Қазақстан» РТРК Сурет: egemen.kz