Ауыл шаруашылығы – маңызды сала

«Нұр Отан» партиясы Төрағасының бірінші орынбасары Асқар Мырзахметов бастаған үгіт-насихат тобы Оңтүстік Қазақстан облысына сапары барысында «Ауыл тұрғындарын жұмыспен қамту» партиялық жобасы бойынша мал шаруашылығымен айналысатын тұрғындармен және «Химфарм» АҚ ұжымымен кездесіп, «Оңтүстік» индустриялық аймағында іске асырылып жатқан жобалармен танысты. Түркістан қаласында штаб мүшелері зиялы қауым өкілдерімен және аймақ ақсақалдарымен жүздесіп, Қ.А.Ясауи атындағы Халықаралық қазақ-түрік университетінде болды. Республикалық сайлауалды штаб мүшелерінің құрамында Мәжілістің V шақырылымының депутаттары Майра Айсина, Саяси кеңес бюросының мүшесі Нұрлан Әбдіров, Халық Қаhарманы Бақытжан Ертаев, «Атамекен» Ұлттық кәсіпкерлер палатасы басқарма төра­ға­сының орынбасары Нұржан Әлтаев, театр және кино актері Нұрлан Әлімжанов, Ұлттық мұражай директоры Дархан Мыңбай және өзге де танымал адамдар болды. Үгіт-насихат тобының мүшелері өңір шаруаларымен кездесіп, аймақтың ауыл­шаруашылық саласындағы жетіс­тік­тері мен мүмкіндіктерін талқылады. Оңтүстік өңірі ауылшаруашылық өнімдерін өндіру бойынша республикада екінші орында. Бес жыл ішінде өндіріс көлемі 2,1 есеге, өсімдік шаруашылығы 2,2 есеге, ал мал шаруашылығы 2 есеге артқан. «Елбасы ауыл тұрғындарын жұмыспен қамтамасыз ету мәселесін қатаң тапсырып отыр. Осы тапсырмаға сәйкес, биылғы жылы Үкіметпен бірге елі­міздің бес облысында қанатқақты жоба басталды. Оған 11 миллиард теңге­ге жуық қаржы қаралған», – деді Асқар Исабекұлы. Сондай-ақ, кездесу «Химфарм» АҚ-та жалғасты. Кәсіпорын SANTO атауы­­мен 200-ден астам өнім түрін шыға­ра­ды. Зауыттың қуаттылығы жылына 1,2 млрд. таблетка және капсула, 294 млн. ампула, 6 млн. инфузия, 40 млн. ан­ти­биотик флакондарын және 26 млн. си­роп шығаруға жетеді. Шым­кент қала­сын­дағы «Оңтүстік» индус­трия­лық айма­ғында штаб делега­циясы шағын және орта бизнес өкілдері­мен кездесті. Бұл аймақ 2010 жылы құ­рылған. Мұн­дағы жобалар металлургия, химия және жеңіл өнеркәсіп, құрылыс индустриясы, машина жасау салаларына бағытталған. Ал Түркістандағы тари­хи-мәдени этнографиялық орталық­та пар­­тия­ның РСҚШ өкілдері ақсақал­дар­мен және зиялы қауым өкілдерімен кез­десу өткізіп, еліміздің әрі қарайғы даму мә­се­лелерін талқылады. Кездесуде туризм саласын дамыту мәселесі де сөз болды. Асқар ТҰРАПБАЙҰЛЫ, «Егемен Қазақстан». Оңтүстік Қазақстан облысы.