17 Наурыз, 2016

«Атырау Жарық» жасөспірімнің 17 549 703 теңге шығынын өтейді

365 рет
көрсетілді
1 мин
оқу үшін
17-03-2016-sud 01АТЫРАУ. 16 наурыз. Атырау қалалық соты қоршаусыз подстансаның аумағында электр тоғынан зардап шеккен жасөспірімнің емдеу шығындарын энергетиктерден өндіруге ұйғарым жасады. Бұл туралы облыстық соттың баспасөз қызметіне сілтеме жасаған egemen.kz тілшісі хабарлады. «Сотқа талап қоюшы талап арызбен жүгініп, кәмелет жасына толмаған баласының «Атырау Жарық» АҚ қызметкерлерінің жауапсыздығынан тоққа соғылып, денсаулығына зақым келгенін көрсетіп, өздерінің қызметтік міндеттеріне немқұрайлы қараған «Атырау Жарық» АҚ-нан материалдық шығынды өндіруді сұрады. Өйткені, 2014 жылдың 19 сәуірінде кәмелет жасына толмаған ұлы қоршалмаған электрлік подстансаның аумағында электр тоғына соғылып, ауыр күйіктерімен ауруханаға жеткізілген. Дәрігерлер баланы аман алып қалу үшін оның екі қолын бірдей кесуге мәжбүр болды. Баланың ата-анасына қазіргі заманғы медициналық көмек көрсету үшін Ыстамбұл қаласындағы (Түркия) MEDICAREINTERNATIONAL медициналық орталығына жүгінуге тура келген. Талап қоюшы ұсынған дәлелдемелеріне сәйкес баланы шетелде емдеу шығыны 142 600 АҚШ долларын құрады. Сот істің барлық мән жәйын зерделеп, жауапкер «Атырау Жарық» АҚ-нан К.-ның пайдасына баланы емдеуге жұмсалған шығын 17 549 703 тенгені өндірді», – деп хабарлады Атырау облыстық сотының баспасөз хатшысы Боранбай Ғалиев. Сот шешімі заңды күшіне енді. Жолдасбек Шөпеғұл. Дерек: Атырау облыстық сотының баспасөз қызметі. Сурет: mng.adilet.gov.kz.