Ақтөбеге Ұлттық банк төрағасы келді

АҚТӨБЕ. 17 наурыз. Ақтөбеге еліміздің бас банкирі келді. Бұл туралы egemen.kz тілшісі хабарлады. Өңірге жұмыс сапарымен келген Ұлттық банктің төрағасы Данияр Ақышев «Ақтөбе ақпарат» орталығында өткен баспасөз конференциясына қатысып, еліміздегі экономикалық даму және оған қаржы институттарының ықпалы, теңгенің тегеурінділігін арттыру сынды мәселелерге тоқталды. Ол сондай-ақ, теңгенің еркін айналым саясатының таяу уақытта өзгермейтінін тілге тиек етті. Ақша айырбастау қызметіндегі өзгерістерді де айналып өтпеді. Қазіргі таңда теңгені шетел валютасына ауыстырушылардан жеке басын куәландыратын құжат талап ету шегінің бұрынғы 2 миллион теңгеден 1 миллион теңгеге дейін төмендетілгенінің неліктен екенін түсіндірді. Теңгені тұрақтандыру бағытындағы басқа да мәселелерге қатысты Ұлттық банк ұстанымдарын тарата баяндады. Ол Мемлекет басшысының тапсырмасымен жүзеге асырылып жатқан ипотекалық немесе ипотекалық тұрғын үй заемдарын қайта қаржыландыру бағдарламасына айрықша тоқталды. «2016 жылдың 1 наурызындағы жағдай бойынша қазақстандықтар ипотекалық заемдарды қайта қаржыландыру бағдарламасы аясында 19 мыңнан астам арыз берді. Олардың ішінде сомасы 76 миллиард теңге болатын 12 421 арыз мақұлданды. Арыз қабылдау жалғасуда. Ұлттық банк бөлінген қаражатты игеру қарқынын арттыру үшін бірқатар шараларды қолға алып жатыр. Ақтөбе облысы бойынша 1136 арыз берілген. Соның сомасы 3,7 миллиард теңге болатын 760-ы мақұлданды», – деп хабарлады қаржылық реттеу құрылымының басшысы. Ол Ұлттық банктің тұрғындардың ипотекалық қарызын өтеуге ықпал ету үшін жұмысты күшейтетінін де атап өтті. Өткен жылы облыстың банктердегі депозиттерінің көлемі 56 пайызға артып, 390 миллиард теңге құрағанын да айтып өтті. Заңды тұлғалардың салымдары 83,2 пайызға артып, 208 миллиард, жеке тұлғалардың салымдары 33,4 пайызға артып, 181,6 миллиард теңгеге жеткен. Данияр Ақышев қазақстандықтардың көбіне теңгелік депозиттерді таңдайтынын жеткізді. Ол БАҚ өкілдерінің еліміздегі қаржы саясаты, несие ставкасы, алтын-валюта қоры және басқа мәселелерге байланысты бірқатар сауалдарына жауап берді. Жұмыс сапары барысында бас банкир облыс әкімі Бердібек Сапарбаевтың қатысуымен өткен екінші деңгейдегі банктердің, сақтандыру компанияларының және ақша айырбастау пункттерінің өкілдерімен кездесуге қатысты. Сатыбалды Сәуірбай. Дерек, сурет: egemen.kz.