17 Наурыз, 2016

«Астана» баскетбол командасы Ресейдің «Зенитінен» жеңілді

364 рет
көрсетілді
1 мин
оқу үшін
17-03-2016-bc astana 01АСТАНА. 17 наурыз. ВТБ Бірыңғай лигасында ойнайтын «Астана» баскетбол командасы кезекті рет жеңіліп, жанкүйерлерін жерге қаратты. Бұл жолы елордалықтар өз алаңдарында Санкт-Петербургтің «Зенитіне» есе жіберді. Кездесу ресейліктердің пайдасына 93:71 есебімен аяқталды. Бұл туралы egemen.kz тілшісі хабарлады. Бірінші кезең толығымен «Зениттің» басымдығымен өтті. Нәтижесінде қонақтар 23:12 есебімен басым түсті. Екінші кезеңде «Астана» қарқынын күшейткенімен, тағы да ресейліктерге жол беруге мәжбүр болды (25:20). Ал үшінші бөлікте астаналықтар екі ұпай айырмашылығымен жеңді (19:17). Дегенмен, соңғы кезеңде басымдықты қайта қолдарына алған «Зенит» ойыншылары 28:20 есебімен жеңіске жетіп, маңызды ұпайларға қол жеткізді. Ойын барысында «Астана» сапынан Алексей Жуканенконың шеберлігімен көзге түскенін атап өткен жөн. Ол осы матчта 20 ұпайды өз атына жазды. Осымен қатарынан сегізінші рет жеңілген Рамунас Бутаутастың командасы әзірге турнир кестесінде 15-орында тұр. «Астана» келесі кездесуін 20 наурызда сырт алаңда Красноярскінің «Енисейімен» өткізеді. Еламан Қоңыр. Дерек: egemen.kz. Сурет: bcastana.kz.