Қарағандыда жол апатынан екі полицей қайтыс болды

ҚАРАҒАНДЫ. 17 наурыз. Қарағанды облысында жол-көлік апатының салдарынан екі полиция қызметкері қаза тапты. Бұл туралы облыстық ішкі істер департаментінің баспасөз қызметіне сілтеме жасаған egemen.kz тілшісі хабарлады. Шахтинск-Қарағанды тас жолында келе жатқан Mercedes Benz автокөлігінің жүргізушісі көктайғақтың кесірінен рульге ие бола алмай, жолдың қарсы бөлігіне шығып кетіп, Renault жүк көлігімен соқтығысқан. Апаттың салдарынан жеңіл көліктегі 22 жастағы жүргізуші мен 34 жастағы жолаушы сол жерде көз жұмды. Ал жарақат алған 28 жастағы жолаушы ауруханаға жеткізілді. Mercedes Benz көлігінде Шахтинск қалалық ішкі істер бөлімінің қызметкерлері болғаны анықталды. Қазіргі уақытта осы оқиға бойынша сараптамалар тағайындалып, тергеу-тексеру амалдары жүргізіліп жатыр. Қайрат Әбілдинов. Дерек: Қарағанды облысы ішкі істер департаментінің баспасөз қызметі. Сурет: news.mail.ru.