Геннадий Головкин Рио Олимпиадасына қатыса алмайды

ҚАРАҒАНДЫ. 17 наурыз. Бүкіләлемдік бокс кеңесі (WBC) осы ұйымның чемпиондарына Рио-де-Жанейродағы жазғы Олимпиада ойындарында өнер көрсетулеріне тыйым салды. Бұл туралы vringe.com спорттық порталына сілтеме жасаған egemen.kz тілшісі хабарлады. Сондай-ақ, мұндай тыйым WBC рейтингісіндегі ТОП-15 санатына енетін боксшыларға да салынды. «WBC мұндай қадам өте қауіпті болғандықтан, жоғары деңгейдегі кәсіпқой боксшылардың ешқайсысы Олимпиада ойындарына қатысу туралы ойламайды деп үміттенеді. Бұл мәселенің басы толықтай ашылмайынша, жарыс форматы қауіпсіз деп бағаланбайынша, WBC өзінің чемпиондары мен ұйымның ТОП-15 рейтингісіндегі боксшыларына алдағы Рио ойындарына қатысуға тыйым салады», – делінген ұйым таратқан хабарламада. Бұл хабарлама осыдан біраз бұрын халықаралық әуесқой бокс қауымдастығының (AIBA) 2016 жылғы Олимпиадаға кәсіпқой боксшылар да қатысуы мүмкін деп жариялаған мәлімдемесіне жауап ретінде қайтарылған. Айта кетейік, WBC тұжырымы бойынша орта салмақта қазіргі әлем чемпионы мексикалық Сауль Альварес. Ал қазақстандық Геннадий Головкин WBC (Interim) титулының иегері. Қайрат Әбілдинов. Дерек: vringe.com. Сурет: ibirzha.kz.