Францияда ірі жол апатынан 12 адам қаза тапты

АСТАНА. 25 наурыз. Францияның Алье департаментінде бейсенбіден жұмаға қараған түні жол апатынан 12 адам қаза тапты. Бұл туралы ТАСС ақпарат агенттігіне сілтеме жасаған egemen.kz тілшісі хабарлады. Оқиға Мулен қаласы мен Монбеньи коммунасының арасында болды. La Montagne басылымының хабарлауынша, микроавтобус пен жүк көлігі соқтығысып қалған. Мерт болғандардың басым бөлігі португалиялықтар. «Португалиялықтар мінген микроавтобус Швейцариядан өз елдеріне келе жатқанда жүк көлігіне соқтығысты. Қаза тапқандардың арасында бүлдіршін бар», – деп аталған басылым хабарлады. Микроавтобус жүргізушісі ауыр жарақат алып, ауруханаға жеткізілді. Ал жүк көлігіндегі екі адам жеңіл жарақатпен аман қалды. Олардың айтуынша, автобус қарсы бетке шығып кеткен. Қазіргі кезде полиция қызметкерлері апат орнында тергеу амалдарын жүргізіп жатыр. Аян Әбдуәли. Дерек: ТАСС. Сурет: ntv.ru.