Құм арасындағы көл

Қытайдың Шыңжаң өлкесі, Алтай аймағы, Қаба ауданынан батысқа қарай жүз шақырым қашықтықта құм арасында Қаратоқты деген көл бар. Өзінің сұлулығымен, көркемдігімен талайды тамсандырған Қаратоқты көлі – табиғаттың ғажайып көрінісі. Көркем көл Қазақстан мен Қытайдың шекарасында жатыр. Ол Қазақстанның Күршім, Зайсан ауданда­рымен шектесетін ше­ка­раға жақын жерде. Осы көлге барып, оның суына аяғын салған адамдардың  айтуынша, бұл – әлемдегі ең көркем жерлердің бірі. Оны бір ғана рет көрген адам қайта келіп, айнадай көлдің айдынын, тереңінен тарайтын ғажайып сәулесін көрмесе тұра алмайды. Көл жа­ғасындағы ағаш жа­пырағы мен шөптер күз мезгілінде алуан түрге боя­лып, құлпырып шыға келеді. Осы кезде ағаш жа­пырақтары мен шөптер құм ортасындағы керемет көлді түрлі бояумен бояп, адамның көзін тартып тұрады. Бұл жерде көгілдір тау да бар. Осы тау құм алқа­бымен керемет жарасып, көлдің сәніне сән қосып тұрғанын көруге болады. Дастан ЖҰМАБЕКҰЛЫ АСТАНА