Тәуелсіздікті ту етер тұғырлы шаралар

Әлемдегі дамыған отыз мем­лекеттің қатарына енуге қадам басып отырған қазақ елінде халқымыздың қадірін арттырып, қасиетін ашатын айтулы мерекелер баршылық. Алайда, Қазақстан қол жеткен барлық игіліктің қайнар көзі болып табылатын Тәуелсіздіктің 25 жылдығының орны бөлек, әсері айрықша екені сөзсіз. Бұл мерекені өзіміз мақтана жүретіндей, өзгелер өнеге тұтатындай деңгейде өткі­зу елдігімізді көрсетеді, өрке­ниет­тілігімізді аңғартады. Үсті­міздегі жылға наурыз айының соңында Мемлекет басшысының Жарлығымен Қазақстан Тәуел­сіздігінің 25 жыл­дығын атап өтуге қатысты. «Бірлік пен жасам­паздықтың 25 жылы» Тұжырымдамасы бекітілуі де сон­дықтан. Тұжырымдамаға сәйкес, Тәуелсіздікті атап өту еркіндік, бір­лік, тұрақтылық, жасампаздық секілді құндылықтарға негізделеді. Әр айда Тәуелсіздік жетістіктері және «Мәңгілік Ел» құндылықтары ая­сында мерекелік шаралар ұйым­дастырылады. Биыл Тәуелсіздіктің 25 жыл­дығына орай өңірде 5 мыңнан астам шара өткізіледі деп күтілуде. Бұл туралы облыс әкімінің орынбасары Асқар Шерияздановтың төрағалық етуімен өткен ел Тәуелсіздігінің 25 жылдығына орай шаралар өткізу жөніндегі комиссияның отырысында айтылды. Отырысқа аудандар мен қала әкімдерінің орынбасарлары, ұйымдастыру комиссиясының мүшелері, ішкі саясат, мәдениет және білім бөлімдерінің, Ғазиза Жұбанова атындағы облыстық филармонияның, Т.Ахтанов атын­дағы облыстық драма театрдың, Достық үйінің басшылары, қоғам­дық ұйымдардың өкілдері қатысты. Басқосу барысында мем­­ле­кет­тік органдар мен Тәуелсіздіктің 25 жылдығына орай­лас­ты­рыл­ған шараларды дайындау жөнін­дегі қауымдастықтың жұ­мысын үйлестіру мәселелері тал­қы­лан­ды. Облыстық ішкі сая­сат бас­қармасының басшысы Ер­бол Нұрғалиевтің айтуынша, Тәуел­сіздіктің 25 жылдығын тойлау барысында тұрғындардың әлеуметтік мәселелерін жақсартуға басымдық беріледі. – 2016 жыл – Қазақстан үшін ерекше жыл. Қазақстан үшін ма­ңызды саналатын күнге орай­лас­тырылған мерекелік шаралар біздің облыста жыл басында басталып кетті. Осы уақыт аралығында көптеген шара, оның ішінде респуб­ликалық деңгейдегі шаралар да ұйымдастырылды. Облыс бойынша Тәуелсіздікке арналған 5 мыңнан астам әлеуметтік маңызы бар, мәдени, спорттық, қайырымдылық шаралары ұйым­дастырылады. Сонымен бірге, өңірде 200-ге тарта әлеуметтік ны­сан қолданысқа беріледі, – деп атап өткен Ербол Нұрғалиев отырысқа жиналғандардың назарына Тәуелсіздіктің 25 жыл­дығына қатысты мемлекеттік комиссия бекіткен логотипті таныстырды. Сатыбалды СӘУІРБАЙ,  «Егемен Қазақстан» Ақтөбе облысы