«Яссы-несие» өрісін кеңейтті

Қарт Қаратаудың етегіндегі Кен­тау қаласында халқымыздың сан ға­сырлық тарихының көзі тірі куәгері –  Қарнақ деген ауыл бар. Бүкіл түркі әлемінің рухани орталығы Қожа Ах­мет Ясауи ке­сенесіндегі атақты тай­қазанды ұсталар осы Қарнақта құйған. Әлем­­дегі ең алып, қасиетті қазан­ның патшалық Ресей кезінде олжаланып, Петербургтегі Эрмитажда бертінге дейін тұрғандығы белгілі. Міне, осындай тарихы бар ауылда «Яссы-несие» серіктестігі шаруалармен табысты жұмыс істеуде. Жақында «Аграрлық несие кор­порациясы» АҚ-тың ұйытқы болуымен журналистер республикада үздіктер қатарынан көрінген «Яссы-несие» серіктестігінің жұ­мы­сымен танысып қайтты. Жалпы, бұл өңірдің шаруалары еңбекқорлығымен ерекшеленеді. «Яссы-несие» серіктестігімен жұ­мыс істеп келе жатқан шаруа­ның бірі Уәлихан Асаев мұндағы қар­жы­ландырудың өте тиімді екен­дігін айтады. Уәлихан Асаев төрт жылдан бері жылыжай салумен айналысып, табысын еселеп келеді. Қазір ол 0,2 гектар жерге қияр, қызанақ еккен. Диқандар бүгіндері қолына түскен ұрықты еге бермейді. Мұнда қызанақтың «Буран» тү­рі, ал қиярдың «Спаин» түрі өсі­ріледі. Уәлихан Асаев жылына 16-17 тонна өнім алады. Қара ба­зар­да қызанақтың килосы 850 тең­геден төмендемей тұрғанын есепке алатын болсаңыз диқанның маңдай терінің өтелгенін шамалай берерсіз. Әрине, қиындық жоқ емес. Жылыжайларға жыл сайы­н беріліп келген субсидияның көлемі шектелді. Үкімет қайтарымсыз мол қаржы береді екен деп отыру ертеңгі кү­нін ойлаған адамды масылдық пи­ғылдан құтқарады.  Өзара бә­се­келестік жағдайда жұмысын дұрыс жолға қойып, артық шы­ғынсыз еңбек ететіндердің ұтысқа шығар жері осы. Осының бәрін ой елегінен өткізген шаруалар «Яссы-несие» серіктестігінен тиімді бағада қаржы алып, жұмыс­тарын жылға қойып жатыр. Мәселен, У.Асаев бес жылға тө­мен пайызбен несие алып, жылы­жайының жылу жүйесін жаңартты. Мал шаруашылығы саласында да жақ­сы табысқа жетіп келеді. Қазір оның шаруа қожалығында 200 бас ірі қара және қазақы еділбай тұқымды мыңға тарта қой бар. Бүгінде «Яссы-несие» серік­тес­тігі жеті жүзден астам шаруа қожалығы мен диқандарды қар­жыландырып келеді. Несие серіктестігі бес жүз мың теңгеден отыз млн. аралығында несие бере алады. Серіктестік басшылығы мем­лекет тарапынан субсидиялау күтіп отырғандығын, ондай жағ­дайда несиенің жартысын Үкімет көтеріп алатындығын айтады. Ауыл шаруашылығы – күрделі сала. Кей жылдары қуаңшылық болса жайылымдық жер табылмай, талай фермерлердің таяқ ұстап қалатындай жағдайы бол­ған. Көктем ерте шығып, соңы үскі­рікке ұласса, жеміс ағаштары да бойындағы нәрінен айырылады. Оның үстіне жемшөп, түрлі ты­ңайтқыштар мен техникаға қар­жы шығарудың қиын-түйін тұс­та­ры бар. Осындай жағдайда ауыл ша­руа­­шы­­лығына мемлекеттік кө­­­мек бү­кіл дүниежүзінде көрсе­тіледі. «Аграрлық несие корпорациясы» АҚ-тың арқасында 2001-2015 жылдары аралығында 163 аудан мен 13 облыс көлемінде 171 несиелік серіктестік ашылған. Бү­гін­гі күндері осы жүйе бойынша 12 мыңнан астам ауылшаруашылық тауар өндірушілері жұмыстарын жолға қойды. Еліміздің азық-түлік қауіп­сіз­дігін қамтамасыз ету бағытында несие серіктестіктерінің жұмысын жолға қойған «Аграрлық несие корпорациясы» АҚ «Сыбаға», «Құлан» және «Алтын асық» мем­лекеттік бағдарламалары бойын­ша да несие аламын деушілерге көмектесіп келеді. Бақтияр ТАЙЖАН, «Егемен Қазақстан» Оңтүстік Қазақстан облысы