Отан – оттан да ыстық

Елбасы Нұрсұлтан Әбішұлының бастамасымен құрылған Қазақстан халқы Ассамблеясы өзінің 25 жыл­дығын атап өткелі отырған тәуелсіз қоғамымыздың сенімді қозғаушы күшіне айналды. Оның биік мін­берінен тарихи әрі тағдыршешті мәсе­лелер көтеріліп, көпұлтты хал­қы­­мызды ұйыстыру арқылы ор­тақ та­быстарға қол жеткізудеміз. Міне, күні кешегі баршамыздың назарымызды аударған Қазақстан халқы Ассамблеясының сессиясы патриоттық акті қабылдау арқылы бейбіт тіршілігіміздің жаңа кезеңі­не қадам жасады. Ең алдымен, мәжілістің ғасыр құбылысы санал­ған әсем Астанамыздағы Бей­біт­ші­лік және келісім  сарайында өткі­зілуінің айрықша маңызы бары анық. Сондай-ақ, Қазақстан халқы Ассамблеясының «Тәуелсіздік. Келісім. Болашағы біртұтас ұлт» күн тәртібімен ашылған XXIV сессиясында Елбасы Нұрсұлтан Назарбаевтың салиқалы сөз сөйлеуі сессия салмағын еселей түсті. Елбасы, Ассамблея Төрағасы Нұрсұлтан Әбішұлы: «Бүгінгі Қазақ­стан халқы Ассамблеясының сес­сия­сы есімізде сақталды деп ой­лай­мын, өйткені, бұл күннен бастап елі­міз­дегі бейбітшілік пен келісімнің жаңа кезеңі ашылады. Біз «Мәңгілік Ел» пат­риоттық актісін салтанатты жағ­дайда қабылда­дық. «Мәңгілік Ел» пат­риоттық актісі бейбітшілік пен ке­лі­сімнің жаңа кезеңін паш етеді, деді. Сонымен қатар, Елбасы акті арқылы барша қазақстандықтардың достық, бейбітшілік пен келісімнің бірыңғай құжаты қабылданғанын атап өтті. Қазақстан Президентінің «Патриоттық актіде ұлы құнды­лық­тар қамтылып отыр. Ондай құн­ды­лықтар – біздің халқымыздың ерік-жігерінің, дана шешімінің көрінісі. Акт кабинеттерде ойластырылған құжат емес, ол – Тәуелсіздігіміздің жемісі», – деп бөлектеп айтуы Тәуелсіздігіміздің ел рухын биікке көтергендігін білдіреді. Отаншылдық – болашағы бір­тұтас ұлттың баға жетпес құнды­лығы, айнымас ұстанымы. Халықтың рухын шынайы патриотизм көтеретінін дәлелдеп жатудың қажеті жоқ. Осы тұрғы­дан алғанда, Елбасының Отан­ның оттан да ыстық екендігі жөнін­дегі қағиданың бағасын жүректер­ге жеткізе білгеніне ризамыз. Қолын­да осындай асыл құндылығы бар Қазақ­стан «Мәңгілік Ел» есі­гін се­німмен ашатынына нық сенімдіміз.    Сәкен ЕРҒАЛИЕВ, «Нұр Отан» партиясы Ақкөл аудандық филиалы төрағасының бірінші орынбасары