Павлодарда жасалған кран

ресейлік кәсіпорында іске қосылды Бұл жаңалық Еуразиялық Топ құрамына кіретін «ERG Service» АҚ филиалы – Павлодар машина жасау зауыты «ПМЗ» үшін жақсы өндірістік жетістік екені сөзсіз. Жүк көтеру қуат­ты­лы­ғы 22 тонналық жан-жаққа бұрылатын тіркемесі бар зауыт­та құрастырылған кранды  (БТЭКК) «ВИЗ-Сталь» (Екате­ринбург қ.) кәсіпорнына өткен жылдың қыркүйек айында жеткізіпті. Зауыт негізінен металл құрыл­­ғылары мен әртүрлі техно­ло­гия­лық бағыттағы жүк көтеру жабдық­тарын, кран техникаларын жасап шығарады. Кәсіпорын қыз­метінің жалпы бағыты көпірлі және тағанды крандар, грейферлер, металл құрылымдар өндірісіне арналған. Жүк көтергіштігі 140 тонналық, 50 тоннаға дейінгі крандарды жасайды. Бұған дейін локомотив, сондай-ақ, электровоз зауыттарына арналған да крандар дайындап шығарды. «ПМЗ» АҚ елімізде алғашқы рет жолау­шылар вагондарына арналған «Тұлпар-Тальго» ЖШС үшін жүк көтергіштігі 20 және 40 тонналық екі трансбордерді дайындады. Яғни, рельсті бір жолдан қатарлас екінші жолға шығаратын арнайы құрал. Оларды жасау үшін зауыттың конструкторлық-техно­логиялық бөлім мамандары Испа­нияға барды, «Тұлпар-Тальго» ЖШС үшін әртүрлі бағыттағы 13 жүк көтергіш крандарды жасап шы­ғарды. Ал «ERG Service» АҚ филиалы – Павлодар машина жасау зауыты өнімдерінің негізгі тұтыну­шылары – қайта өңдеуші, тау-кен өндеуші, мұнай-газ, металлургия және өнеркәсіптің басқа да салалары. Бұл күндері компанияда 400-дей адам еңбек етуде. Кәсіпорын жүк көтергіш кран­­дардың жобасын тапсырыс беру­шінің сұранысы бойынша жасайды. Ресейге жеткізілген жаңа кран «ВИЗ-Сталь» қоғамдастығына арнайы құрастырылып, жеткізілген төртінші кран көрінеді. Ал жалпы, жергілікті өнертап­қыштар құрастырып, зауытта жаса­лып шыққан павлодарлық кран­ның ерекшелігі – жан-жаққа бұры­латын құрылғысының өздігі­нен қосалқы редуктордың көме­гімен басқарылып жұмыс жасай­тындығында. Ресей кәсіпорнында іске қосылып, Қазақстанда жасал­ған кран сынақтан сәтті өтті. – Сондықтан, біз жасап шыққан бұл алып қондырғы көп жыл жұ­мыс жасай алады. Кез келген кезде жөндеуге де ыңғайлы. Еңбек қауіпсіздігі сақталады, – дейді зауыттың бас конструкторы Леонид Шмуленсон. Осындай өзіндік ерекшеліктері бар Ресей кәсіпорнынан жеткізілген крандар «Қауіпті өндірістік нысан­дардағы қауіпсіздік талаптары» (Ростехнадзордың 12.11.2013 ж. №553 бұйрығы) және «Электр қон­дыр­ғыларын орнату ережелері» мен Кеден одағының техникалық мөл­шерлемелік талаптарына сай келеді. – Екіншіден, баға мен сапа тұрғысынан алғанда да сыртқы на­рықта бәсекеге қабілетті. Өйткені, зауыттың техникалық паркі жүйелі түрде жаңаланып, заманауи үлгідегі құрал-жабдық, қондырғылармен толығып тұрады. Жыл сайын жұ­мысшылардың, мамандардың білімін жетілдіру мен аттестаттау жүргізіледі, – деді зауыт директоры Леонид Белогривый. Үшіншіден, кәсіпорын дирек­торы айтқандай, зауыт еліміз­дегі көптеген отандық кәсіп­орын­­дарға жүк көтеру крандарын жа­сайды. Жергілікті үлесті арт­ты­ру­ға мүм­кіндік беруде. Кран­дар «Қазцинк» ЖШС, «Арселор­Миттал» АҚ, «Қа­зақмыс» Корпо­ра­ция­сы» ЖШС, «Қа­зақстан» темір жолы» ҰК» АҚ, «Кастинг» ЖШС сын­ды ком­па­ния­лар мен ERG тобы­ның кәсіп­орындарында пайдаланады. Мысалы, «Қазхром ТҰК» АҚ-пен 1,6 млрд. теңге сомасына жүк көтеру крандарын жеткізуге келі­сім­шарт жасалды. Ақтөбе және Ақ­су ферроқорытпа зауыттары үшін кран жасау жоспарланып отыр. Сондай-ақ, былтырғы жылы «ПМЗ» АҚ Еуразиялық Топ құра­мына кіретін «ERG Service» АҚ филиалы болып, жабдықтарды жөндеу бойынша тапсырыстар қабылдай бастады. «ERG Service» АҚ пен ERG-дің жөндеу жұмыстары жөніндегі директораты барлық жөндеу жұмыстарының жоспарларын әзірлеп, компанияға қарасты кәсіпорындар күшімен жасалатын жөндеу жұмыстарының түрлерін белгіледі. Және тек өзіне ғана емес, Еуразиялық Топ құрамына кіретін басқа да кәсіпорындар үшін де. Осылайша, жөндеу жұмыстары бойынша ERG кәсіпорындарынан 1,2 млрд. теңге көлемінде тапсырыс қабылданды. Қазіргідей экономикалық қиын кезеңде мұның маңызы ерекше екені анық. Нәтижесінде зауытта жөнделген анод ұстауыштар «Қазақстан электролиз зауыты» АҚ-та табысты қолданылып келеді. 2015 жылы «ПМЗ»-да 1,2 млрд.-тан астам теңге көлемінде өнім өндірсе, 2016 жылы бұл көлемді төрт есеге, яғни 4,6 млрд. теңгеге жеткізбек. Фарида БЫҚАЙ, «Егемен Қазақстан» Павлодар облысы