Соғыс қасіреті қайталанбасын

Кеше Ұлттық музей ұжы­мының ұйым­дастыруымен «Ұлы Отан соғысы тақырыбын музей экспозицияларында және оқу орындарында  көрсетудің  әдістері» атты шара өтті. Дөңгелек үстелдің ашылуында сөз алған Ұлттық музей директоры Дархан Мыңбай Қазақ еліндегі бейбіт өмірге тоқталып, өткеннен сабақ алудың маңыздылығы туралы айтты. – Ұлы Отан соғысының зардаптарын айтып тауыса алмайсыз. Бірақ ол біздің тарихымыз, оны ұмытуға болмайды. Біздің жас ұрпақ бейбіт заманда өмір сүріп жатыр. Лайым, әрқашан солай болсын деп тілейміз. Десе де, өткеннен сабақ алу, бар­дың қадірін бағалай білу ке­рекпіз. Соғыстың зардабын есептеп, оның орнын толтыру еш мүмкін емес. Алайда, елі үшін жанын қиған батырларымызды ұлықтау, оларға құрмет көрсету әрбіріміздің азаматтық парызымыз. Еш жерде оқ атылмасын, жер бетінде бейбітшілік салтанат құрсын, – деді Д.Мыңбай. Ұлы Отан соғысы ардагері Николай Козак соғыстың қайғы-қасіреті адам санасында өшпес із қалдырғанын қайғыра еске алып, ынтымақ пен келісім адамзаттың асыл құндылықтарының бірі екенін тілге тиек етті. – Талай қиындықтарды басымыздан өткердік. Қанша жылдар өтсе де оның бәрі ұмытылмайды. Шайқас турасында айту маған өте ауыр. Ең бастысы, жас ұрпақ соғыс көрмесін, тыныштықта өмір сүрсін. Болашағымыз жарқын болсын. Балалар ата-анасынан ажырамасын, – деді Н.Козак. Сонымен қатар, іс-шара барысында әскери техникалар мен әскери миниатюралардан құралған шағын көрме көпшілік назарына таныстырылып, олардың жасалу жолдары түсіндірілді. Жиын соңында Ұлы Отан және Ауған соғысы ардагерлеріне Ұлттық музей атынан естелік сыйлықтар табыс етілді. Рауан ҚАЙДАР, «Егемен Қазақстан»