Дзюдошы Альбина Амангелдиева Гран при турнирінің финалына шықты

АСТАНА. 15 мамыр. Бүгін Алматыдағы Балуан Шолақ спорт сарайында дзюдодан әлемдік Гран при турнирінің соңғы үшінші жарыс күні өтуде. Бұл күні ерлер арасында 90, 100 және +100 кило салмақ дәрежесінде, ал әйелдер бәсекесінде 78, сондай-ақ, +78 килода жеңімпаздар анықталады. Бұл туралы Қазақстан дзюдо федерациясының баспасөз қызметіне сілтеме жасаған egemen.kz тілшісі хабарлады. Өкінішке қарай, 100 және +100 килода белдескен ерлеріміздің барлығы қарсыластарына есе жіберіп, жүлдесіз қалды. Олардың ішінде жанкүйерлер сенім артқан Ержан Шынкеев (+100 кг), Руслан Әбдіразақов (+100 кг) сынды тәжірибелі палуандар да бар. Ал 90 килода бақ сынаған жігіттеріміздің арасында Дәулетхан Жақыпов қола медаль үшін белдесуге мүмкін алды. Әйелдер арасындағы бәсекеде 78 килода ел намысын қорғаған Альбина Амангелдиева финалға шықты. Ал тәжірибелі палуан қызымыз Гүлжан Исанова (+78 кг) қарсыласына есе жіберіп, жүлдеден құр қалды. Үшінші орын үшін және финалдық бәсекелер жарыс күнінің кешкі сессиясында өтеді. Ол белдесулер сағат 17:00-ден бастап KazSport телеарнасында тікелей эфирде көрсетіледі. Айта кетейік, алғашқы екі жарыс күнінің қорытындысы бойынша Қазақстан қоржынында 1 – алтын, 2 – күміс және 2 қола медаль бар. Бұл көрсеткішпен Қазақстан құрамасы жалпы есепте 2-орында тұр. Жалғыз «алтынды» 48 килода белдескен палуан қызымыз Галбадрах Отгонцецег алса, ерлер бәсекесінде бақ сынаған Рустам Ибраев (60 кг) пен Жансай Смағұлов (66 кг) күміс медальді мойындарына тақты. Ал Елдос Жұмақанов (66 кг) пен Дидар Хамза (73 кг) қола медальға қол жеткізді. Тағы бір ескере кететін жайт, Гран при турнирінде чемпион атанған палуанға – 300, ал 2-орын иегеріне – 180, қола жүлдегерге 120 ұпай беріледі. Жалпы, бұл сайыста әлемнің 84 елінен келген 400-ге жуық дзюдошы бақ сынауда. Еламан Қоңыр. Дерек, фото: Қазақстан дзюдо федерациясының баспасөз қызметі.