Балалар арасында әлем рекордшысы, кеудені жерден көтеруден Қазақстан рекордтар кітабына төрт мәрте кірген Әмір Махмет Олимпиадаға қатысатын спортшыларды қолдау ретінде жаңа рекорд жасады.
Ол кеудесін жерден 1 000 рет көтерді. Көрсеткішті КИнЭС Қазақстан рекордтар кітабының ресми өкілі Қуандық Құдайбергенов тіркеді.
Әмір Махмет алғашқы рекордын былтыр 1 маусымда «Балаларды қорғау күні» мерекесіне орай Bar Bars командасы ұйымдастырған Street Workout бойынша жазғы маусымының ашылу салтанаты кезінде жасады. Сол кезде кеудесін жерден 450 рет көтерген болатын. Екінші рекордын Street Workout-тан өткен Ақмола облысының чемпионатында енгізді. Ол 30 минутта кеудесін жерден 50 рет көтерді. Ал үшінші рекордын былтырғы жылдың қыркүйегінде Қазақ хандығының 550 жылдық мерейтойы аясында өткен шарада жасады. Әмір Қазақ хандығының 550 жылдығына байланысты кеудесін жерден 550 рет көтеріп, тағы да рекордшы атанды. Бұдан кейін балалар арасындағы әлемдік рекордын бокстан кәсіпқойлар арасында әлем чемпионы Геннадий Головкиннің Доминик Уэйдпен өтетін жекпе-жегіне қолдау ретінде тіркеді.
Әмір – Астанадан 40 шақырым жерде орналасқан Қажымұқан ауылының тұрғыны. Оның ағасы Айдар Махметов Қазақстанның еңбек сіңірген спорт шебері, каратэ және ММА-дан үш дүркін әлем чемпионы, джиу-джитсудан үш дүркін Еуропа чемпионы. Атасы Әлімжан Махметовтің спорттың алты түрінен разряды бар. Тағы бір ағасы Азат Махметов бокстан Қазақстан чемпионы, Қазақстан құрамасы мен «Астана Арланс» командасының мүшесі.
Дастан КЕНЖАЛИН,
«Егемен Қазақстан»