«Ардос-Жүрек» мүгедектер бірлестігінің бастамасымен «Инклюзивті білім – болашаққа бастар жол» жобасының тұсауы кесілді.
Қалалық демалыс орындарының бірінде орналасқан оқу-дамыту лагерінде бүгінде 50-ге жуық жүріп-тұруы қиын балалар түрлі пайдалы істермен шұғылданады. Қазақстанның Бірінші Президенті қорының қолдауына ие болған жобаны жүзеге асырушылардың бірі – «Ардос-Жүрек» мүгедектер ұйымының жетекшісі Ақжан Кәрімнің айтуынша, бағдарламаны қаржыландыруға 2 миллион теңге грант жұмсалып, оның аясында интерактивті семинарлар, тренингтер, музыкалық, арт жаттығулар, ойын терапиялары жұмыс істейді. Ақжан өзінің туабітті мүгедектігіне қарамастан қимылы ширақ.
– Аяқ-қолы бүтін, денсаулығы жақсы қатарластарына қарағанда, мүмкіндігі шектеулі балалар өздерін кем сезініп, жасқаншақтап тұратыны жасырын емес. Осындай әлеуметтік теңсіздіктерге жол бермес үшін инклюзивті білім берудің артықшылықтарын пайдалану, ең бастысы, кішкентай тұлғаның жан-жағына қызығушылық, қоршаған ортаға бейімделу сияқты қабілет-қарымдарын ашып, қалыптастыру – басты мақсатымыз, – дейді психолог маман Ғалия Баязитова.
Осында екі ұлын ертіп әкелген ата-аналардың бірі Татьяна Пипус қоғамдық ұйымға деген ризашылығын жасырмайды.
Қызылжар өңірінде қолға алынған қанатқақты бағдарламаны ұйымдастырушылар келешекте мектеп бағдарламасы шеңберінде үйде білім алатын мүмкіндігі шектеулі балаларды онлайн оқыту жүйесімен қамтуды көздеп отыр. Мұндай санаттағы балдырғандардың саны 150-ге жуық.
Өмір ЕСҚАЛИ, «Егемен Қазақстан»
Солтүстік Қазақстан облысы