Мектепке жол жарқын болсын

Дәстүрлі «Мектепке жол» акциясы Жетісу жерінде де басталып кетті. Себебі, бүлдіршіндердің бірі білім ордасының табал­ды­ры­ғын аттауға асықса, бірі күнкөріс қамы үшін базар жаға­лап, тағы бірі – алқаптарда жүр. Ата-анамызда бар екен деп за­манауи құралдардан бас көтер­мей­тіні өз алдына. Әйтеуір, бүгін­де әлеуметтік теңсіздік етек жа­йып бара жатқаны анық. Солай екен деп билік қол қусырып қарап отыр­ған жоқ. Алматы об­лыс­тық әкім­­дігінде Елбасының оқу­шы­лар­­дың мектепке толық баруын қам­та­масыз ету туралы тапсырмасына сәйкес, тақырып аясында жиын болды. Оны Алматы об­­лы­­сы әкімінің орынбасары Бақтияр Өнербаев ашып, жүргізіп отырды. «Ағымдағы жылдың 1 тамыз-30 қыркүйек аралығында «Мек­тепке жол» дәстүрлі респуб­ликалық қайырымдылық акциясы Тәуелсіздіктің 25 жылдығына орай «Бақытты балалық шақ ме­кені» ұранымен Жетісу жерін­де де басталып, қанатын жай­ды. Акцияның мақсаты – көп балалы отбасынан шыққан оқушыларға, жетім балаларға, ата-ана қамқор­лығынсыз қалған балалар­ға қолдау көрсету және түрлі әлеу­меттік себептер бойынша мектепке балалардың бара алмауының алдын алу. 2015-2016 оқу жылында 51 237 балаға 427 млн. 500 мың теңге көлемінде көмек көр­сетілген еді. Соның ішінде 46 392 балаға 375 млн. 8 мың теңгеге демеушілер оқу құралдары мен мектеп формаларын сатып алып берген болатын. Ал ағымдағы жылы жалпы 55 мың балаға көмек көрсетілейін деп отыр. Негізі, биыл да облыс әкімі Амандық Баталовтың «Мектепке жол» акциясын өткізу туралы арнайы өкімі шықты», деді өңір басшысының орынбасары. Бұл күндері білім беру саласы мен ішкі істер органы қызмет­кер­лері және ерікті ата-аналар бірлесе түнгі клубтар мен шаруа қожалықтарының алқаптарын, сая­жайларды аралап оқушылардың оқудан кешікпеуіне ықпал етуде. Рас, қаламын, кітап-дәптерін, тіпті компьютерін дайындап отырған балалар жетерлік. Бұл оқуға деген ынтаны, ұқыптылықты, алға ұмтылушылықты білдіретін фактор. Әйткенімен, сананы билей­тін өзге де жайттарды жасыра алмаймыз. Дей отырып, Білім күні жақындағанда байбалам сал­ғаннан еш нәрсе өзгермейтінін қайта би­лік­тің жайлап болса да игі қадам жасағанын қолдау қажет. Құп­тарлығы сол – балалардың құ­қық­тарын қорғау, ішкі істер, еңбек және халықты әлеуметтік қор­ғау органдарымен, кент, ауыл әкімдерімен, жастар, балалар және үкіметтік емес ұйымдармен, ата-аналармен бірлесе отырып, әр елді мекенде қиын бала­лар тобына жататын, оның ішінде қараусыз, қадағалаусыз қалған және жағдайы жоқ отбасылар мен мигранттар балаларын, сон­дай-ақ өзге де себептермен жүйелі түрде сабаққа бармайтындар­ды анықтау үшін рейдтерді жүр­гізілуде. Екіншіден, акцияның басында және соңында «Балаларды мектепке жинауға көмектес», «Оқу­шыға мектепке барар жол­ды табуға көмектес», «Бар­лық балалар мектепте оқуға тиіс», «Мен мектепті таңдай­мын» деген шара аясында қайы­рым­дылық көрсетушілер немесе меценаттар фестивалі ұйымдастыратынын билік айтып отыр. Үшіншіден, акция қорытындылары аудан, қала әкімдігі жанындағы кәмелетке толмағандардың істері жөніндегі ведомствоаралық комиссияның отырыстарында қаралатыны да көп жайды аңғартады. Нұрбол ӘЛДІБАЕВ, «Егемен Қазақстан» ТАЛДЫҚОРҒАН