Ішкі көші-қон саясаты бағдарламасы шеңберінде шалғайдағы Ш.Уәлиханов ауданына биыл 17 отбасы келсе, араларында Кәрібаевтар әулеті де бар. Шаңырақтың иесі Жандос «Жолдасбай Агро» фермерлік шаруашылығына тұрақты жұмысқа орналасып, еңбек десе ерінбейтін елгезектік қасиетімен көріне білді.
Ол Оңтүстік Қазақстан облысы Сайрам ауданы Ақсукент ауылында дүниеге келіп, осы жерде мектеп бітірген. Мамандық даярлау курсында оқып, «В», «С», «Е» санаттағы көлік жүргізушілік куәлігіне ие болған. Туған жерінде механизатор болып еңбек етіп келген ол теріскей жаққа қоныс аударғанға дейін осы кәсібінен нәсіп тауып отырған. Бүгінде «КамАЗ» көлігіне жүргізуші ретінде қабылданып, кәсіби біліктілігіне ұжым риза.
– Үкімет тарапынан бір реттік өтемақы берілді. Жұмыс та, баспана да дайын екен. Біз еліміздің бір қиырына байлық емес, мақсат қуып келдік. Ол – Отанымызды өркендетуге өз үлесімізді қосу, – дейді қарапайым еңбек иесі.
Жаңа қонысқа отағасының соңынан отбасының басқа мүшелері де жетіп, бүгінде Кішкенекөл ауылында тұрады. Жандостың жан жары Сәуле – төрт баланың анасы. Алды – 11 жаста, кенжелері – 5 айлық. Ол Шымкент қаласындағы гуманитарлық-экономикалық колледжді бастауыш сынып мұғалімі мамандығы бойынша тәмамдаған. Еңбек өтілі – 10 жыл. Балалары есейген соң еңбек етуді армандайды. «Жолдасбай Агро» фермерлік шаруашылығының басшылығы көп балалы отбасына барлық әлеуметтік жағдайды жасап, баспанаға дейін сатып әперген.
– Жұмыстан рахат алу, табыс табу – мен үшін үлкен бақыт. Қолдау көрсеткен ағайынды Жолдасбаевтарға ризашылығым шексіз. Олар біз секілді көптеген отбасына көмек көрсетіп келеді. Құшақ жая қарсы алып, елдің, жұрттың қамын жеп жүрген осындай жанашырлар көбейе бергей, – дейді «темір тұлпар» тізгіндеген ақжарқын азамат.
Сарман АЯЗБЕКОВ
Солтүстік Қазақстан облысы,
Уәлиханов ауданы