Милан мен Римде Қазақстанның Италиядағы елшілігінің қолдауымен Қазақстан Республикасы Тәуелсіздігінің 25 жылдығына арналған «Қазақконцерт» Мемлекеттік концерт ұйымының әртістері мен шығармашылық ұжымдарының гастролі болып өтті.
Қазақстан өнер шеберлерінің қатысуымен концерттер Италияның Миландағы «Пиколло театро», Римдегі «Санта Чечилия» академиясы секілді атақты концерт залдарында ұйымдастырылды.
Концерттердің бағдарламалары қазақтың дәстүрлі музыка мәдениетінің көпқырлылығы мен байлығының жарқын көрінісіне айналды. «Ұлы Дала әуендері» прологы өзіндік ой-өрнегі бар түркі дүниесінің ауанын қалыптастырды. «Қазақконцерттің» фольклорлық-этнографиялық ансамблінің «Арлан» ұлттық костюм театрының актер-батырларымен бірлесіп орындаған қазақтың халық музыкасы көрермендерді қазақ халқының ежелгі тарихына қарай жетелегендей болды.
Концертті Үкімет мүшелері, депутаттар, Милан мен Рим қалалары мэрияларының өкілдері, университеттердің профессорлық-оқытушылар құрамы, студенттер мен оқушылар, Италиядағы қазақ диаспорасы, сондай-ақ, шетел дипломатиялық миссияларының өкілдері мен журналистер тамашалады.
Концерттік бағдарламаға қазақ дәстүрлі ән өнерінің жарқын өкілі Ерлан Рысқали, «Шолпан» би ансамблі, әнші Әсел Қарсыбаева және басқалар қатысты. Италиялық көрермендер, сондай-ақ, Аян Омаров, Анар Мұздаханова, Әйгерім Қожабаева және Мира Тастенова секілді белгілі өнерпаздардың орындауында қазақтың домбыра, қылқобыз, жетіген, сазсырнай сияқты халық аспаптарының үнін естуге мүмкіндік алды.
Өзінің өнерлерін, сонымен қатар, академиялық бағыттағы әншілердің айтулы өкілдері Әйгерім Алтынбек пен Қазақстан Республикасының еңбек сіңірген қайраткері Азамат Жылтыркөзов ортаға салды. Олар тек қазақ композиторларының шығармаларын ғана орындап қоймай, Италия опера классикасының репертуарларынан шедеврлерді де көрермендер назарына ұсынды.
«Егемен-ақпарат»