«Сыбаға» ауыл шаруашылығы тауарларын өндірушілер үшін ең қолжетімді несиелендіру бағдарламасының бірі. Сондай-ақ, бұл осы бағытта өз бизнесін ашуға ниеттенген, бірақ, мал шаруашылығы саласының жұмысында тәжірибесі жоқтар үшін тиімді. Бұған қосымша, несиелендіру жағдайын жасау кезінде жекеменшік бизнестің мүддесі мен мүмкіндігі есепке алынды. Сыйақының пайыздық деңгейі де төмен. Яғни, 14 пайыздың жартысын мемлекет субсидиялайды. Оның үстіне, қарыз толтыру жұмысы мен жеңілдік мерзімін кепілдікпен қамтамасыз ету талабы да қысқартылған.
Тауарлық табынның тұқымдық сапасын жақсартуды көздейтін бағдарламаға Аршалы ауданында айрықша қызығушылық байқалады. Мәселен, биылғы жылы ауданда 5 шаруашылық бағдарламаға қатысса, екі шаруашылық 53 миллион 250 мың теңге несиені рәсімдеді.
Ауыл шаруашылығы тауарларын өндірушілер ет бағытындағы 162 ірі қара сатып алды. Атап айтатын болсақ, «В.Сураев» шаруа қожалығы 63 ірі қара, «Арнұр» жеке кәсіпорны 30 бас, «Михайловский» серіктестігі 30 бас, «Нарнұр» жеке кәсіпорны 17 бас және бір бұқа, «Ғазес» шаруа қожалығы 20 бас ірі қара және бір бұқа сатып алды. Жуырда «Дана» шаруа қожалығы мен «Қожаханов» жеке кәсіпорны асыл тұқымды 259 ірі қара мал сатып алу құжаттарын дайындады.
«В.Сураев» шаруа қожалығының басшысы Виктор Сураевпен тілдескенімізде ол: «Маған аудандық ауыл шаруашылығы бөлімінің қызметкерлері, әсіресе, бас маман Меңгүл Ыбыраева тиісті құжаттарды дайындауыма көмектесті. Бағдарламаның әрбір тармағын жете түсіндірді. Ауыл тұрғындарының көбі несие алуға жүрексінеді. Қиыншылықтан қашпайтын адамдарға мемлекет субсидиялау арқылы қолдау көрсетіп, жан-жақты көмектесетіні қандай ғанибет. Мемлекеттің қолдауынсыз мал басын көбейте алмас едік. Бұл үлкен еңбек. «Сыбаға» ауыл адамдарын үлкен істерге жігерлендіреді».