Жақында Қазақстан Республикасының Грек Республикасындағы елшілігі «Ш.Айманов атындағы Қазақфильм» АҚ-пен бірлесіп, Тәуелсіздігіміздің 25 жылдығы мен Қазақстанның Тұңғыш Президенті күніне орай Ахарнэ қаласында «Жұлдыздар тоғысқанда» атты фильмнің көрсетілімін өткізді.
Көрсетілім тұрғындарының басым бөлігі бұрынғы отандастырымыз – қазақстандық гректерден тұратын қалада өткізілсе, мұның өзіндік нышандық мәні бар еді. Шақырылған қонақтар арасында Грек Республикасының қоғам және саяси қайраткерлері, дипломатиялық корпус, іскер топ және мәдениет өкілдері, Ахарнэ қаласының басшылығы болды.
Қазақстан Республикасының Грек Республикасындағы Төтенше және өкілетті елшісі А.Волков фильм алдындағы сөзінде «Қазақстанның Тұңғыш Президенті тек өз мемлекетінің ғана емес, көпшілікпен мойындалған жалпы Орталық Азияның көшбасшысы екенін, сонымен қатар, ядролық қаруды таратпау, қарусыздану салаларына қосып келе жатқан зор үлесі әлем мемлекеттерінің басшылары мен халықаралық ұйымдар тарапынан мойындалған тұлға» екенін атап көрсетті.
Іс-шара соңында қонақтар фильмнен алған әсерлерімен бөлісті. Қазақстанның орынды мақтанышы саналатын ұлтаралық келісім саясатын толықтай қолдайтындарын білдіріп, бұрынғы отандастарына деген сағыныштарын жасырмай айтты.
«Егемен-ақпарат»