Шығыс халықтарының жаңа жылы Қызылжар өңірінде өз мәнінде аталып өтті. Әз Наурыз облыс орталығының барлық шағын аудандарын қамтыды. Орталық алаңда өткен мерекелік жиында облыс әкімі Серік Біләлов биыл ұлық мерекенің ұлттық нақышта өтуіне үлкен мән берілгенін атап көрсетсе, белгілі ақын-жерлесіміз Кәкімбек Салықов жырдан шашу шашты. Тойға Ресейден ағайындарымыз арнайы келді.
Наурыздың көрігін ақындар айтысы қыздырды. Іріктеліп шыққан бес жұп арасынан республикалық додаларда жарқырап көзге түсіп жүрген көкшетаулық Әлібек Серғалиев бас жүлдені жеңіп алды. Петропавлдық студент Жарқын Жұпарханға бірінші орын бұйырды. Екінші орындарды есілдік Жұмабек Рахымов пен Ғ.Мүсірепов ауданының намысын қорғаған Құрмет Құралхан бөлісті. Жеңімпаздар мен жүлдегерлерге бағалы сыйлықтар тапсырылды.
Өмір ЕСҚАЛИ, Солтүстік Қазақстан облысы.