«Зенит» командасының жастар құрамы Viareggio Cup турниріне қатысу үшін кеше Италияға аттанды. Бұл туралы sports.kz хабарлады.
Игорь Симутенков жаттықтыратын ұжымның сапында қазақстандық жас шабуылшы Еркебұлан Сейдахметов те бар.
Виареджо жерінде өтетін додаға Италия, Голландия, Канада, АҚШ, Бразилия, Аргентина, Нигерия, Чехия, Грекия, Конго ДР, Бельгия, Хорватия, Ресей және Колумбия елдерінен барлығы 40 команда қатысады. Ұйымдастырушылар төрт командадан әр топқа бөледі.
«Зенит» топтық кезеңде италиялық «Эмполи», «Асколи» және америкалық «Атлетик Юнион» командаларымен күш сынасады. Плей-офф кезеңіне 10 команда және екінші орын алғандар арасында үздік шыққан алты ұжым шығады.
Айта кетейік, "Тараз" футбол клубының түлегі соңғы бір айда ресейліктермен бірге жаттығып жүр.