Оның бастамасы өзге кәсіпкерлер тарапынан қолдау тапты. Ардагерлер кеңесі, «Қызыл Жарты Ай» қоғамы да қолұшын беруге әзір. Сөйтіп, бүгінде су тасқынынан өте-мөте қиындық көрген отбасыларына қайырымдылық жасау мақсатымен арнайы есепшоттар мен пункттер ашыла бастады. Жиналған қаражат пен құрылыс заттары, тұрмыстық бұйымдар Рузаев ауылдық округінің тұрғындарына табыс етіледі. Новоишим ауылындағы «Балицкий» ЖК құрылыс алаңында материалдық көмектерді сақтауға және үлестіруге арналған екі пункт құрылды.
Су тасқынына душар болған «Богатырев» серіктестігінің жетекшісі Алихан Барахаевтың күпті көңілі орнына түсіп, үрей уайымнан арылған сыңайлы. Жергілікті билік орындары келген залалды өтеп, көктемгі егіс науқанын талапқа сай өткізуіне уәде берген. Сол сияқты Максим Руденко, Сергей Синельник секілді тұрғындар да өтемақыдан үмітті.
Төтенше жағдайлар жөніндегі департамент мамандарының сөздеріне қарағанда, таяу күндердің ішінде Есіл өзені арнасынан асады деп күтілуде. Петропавл су торабының жетекшісі Қайрат Мұхамадиев су деңгейі бір қалыпта ұсталып тұрғанын, тасқынға қарсы құрылған комиссия шұғыл атқаратын шараларды нақтылағанын жеткізді.
Аймақ басшысы Құмар Ақсақалов жағдайды тікелей өз бақылауына алып, көмек шараларын, шығынды есептеу жұмыстарын жедел жүзеге асыруға, қауіп-қатердің алдын алуға, туындай қалған жағдайда барлық күшті жұмылдыруға нақты тапсырмалар берді. Селекторлық жиында су шайған аумақтар мен қатты зардап көрген адамдарға жан-жақты қолдау жасалатынын, дүрлігуге ешқандай негіз жоқтығын қадап айтты.
Өмір ЕСҚАЛИ,
«Егемен Қазақстан»
Солтүстік Қазақстан облысы