Биыл Ғабдолла Тоқайдың (1886-1913) туғанына 125 жыл толады. Соған орай Ресейде отандық және әлемдік сөз өнеріне өзіндік шығармашылық үлесін қосқан көрнекті ақынның мерейтойы аясында көптеген іс-шаралар жүзеге асырылуда. Осынау татар поэзиясы классигінің күндері жақында Ресей астанасында болып өтті. Алдағы уақытта ақын шығармашылығына арналған семинарлар, поэзия кештері, көрмелер Ресей өңірлерінде жалғаспақ және бірқатар шет елдерде де нақты іс-шараларды жүзеге асыру көзделуде.
Бауырлас татар халқының ұлы перзентіне арналған мерекелік сәттің маңызды көрінісі – Ғабдолла Тоқайға Мәскеуде орнатылған ескерткіш. Ресейдің еңбек сіңірген суретшісі Салауат Щербаковтың шығармашылық еңбегінің жемісі болып табылатын бұл монумент таяуда Новокузнецкий көшесіндегі гүлзарда ашылды.
Ғабдолла Тоқай ескерткішінің ашылу құрметіне орай Мәскеу және Татарстан Республикасы мәдениет қайраткерлерінің қатысуымен үлкен концерт ұйымдастырылды, ал Мәскеудің А.Пушкин атындағы драма театры сахнасында Татарстанның мемлекеттік жастар театры Ғабдолла Тоқай шығармалары негізінде әзірленген спектакль көрсетті.
Серікқали БАЙМЕНШЕ, «Егемен Қазақстан» – Мәскеуден.