Жалғыз алтын

Сенбі күні Астанада бокстан жасөспірімдер арасында өткен әлем чемпионаты аяқталды. Сөйтіп, бір апта бойы Астана төрінде 48 елден келген 273 боксшы күн сайын шаршы алаңда тер төгіп, ең соңында құрдастары арасында нағыз мықтыны анықтады. Бұл бәсекеде Қазақстан құ­ра­масы 1 алтын, 1 күміс, 3 қола медальмен жалпыкомандалық есепте төртінші орынға ие бол­ды. Біздің құрамада жалғыз ал­тын жүлдені 54 килодағы Бекжан Кібітқалиев жеңіп алды. Бір күміс жүлдені ауыр салмақта күш сынасқан Дидар Төлеген әкелді. Финалда ол Өзбек­стан­ның Ойбек Шарипов деген бокс­шысына есе жіберді. Бұл айқаста өзбек баласы Төлегенді шеберлігі арқасында жеңгенін мойындау керек. Көз алдымыз­да әдемі бокстасып, барлық қарсыластарын оңай жеңген Шариповтың осындай мықты­лы­ғын мойындамасақ бізге сын. Ал Төлегеннің бір жақсы жері, ол финалға дейін бәрін қинал­май ұтып, соңғы сында Шариповпен иық теңестіріп айқасты. Дидар одан бір елі кем өнер көрсеткен жоқ.  Бірінші және екінші раундта есе жібергенімен, үшінші раундта қамшыны басты. Осылай жеңіске деген жі­герін көрсеткен боксшы­ның финалдан соң өз-өзіне келе алмай, көзіне ерік жібергеніне де куә болдық. Бокс, спорт деген осы. Әрқашан жеңіс пен жеңіліс қатар жүреді. Бірақ, өз алаңын­да өзбек сияқты біздің спорт­тағы ежелгі бәсекеле­сі­мізден жеңілу­дің дәмі тым ащы екенін де ұмытпайық. Осы бәсекеде Аян Қалы­беков (60 кг.), Дәуітбек Қайыр­гелді (63 кг.), Асқар Дүйсәлі (75 кг.) қола жүлдені қанағат тұтты. Жартылай финалда үш боксшы­ның екеуі қарсыластарынан таза жеңілді. Қа­лыбеков пен Қайыр­гел­діге қай­рат, жігер жетіспеді. Оны айта­мыз, екеуінің айқасқаны да көбі­міздің көңілімізден шықпа­ды. Ал Асқар Дүйсәлінің финалға шы­ғуға жөні бар еді. Ол жекпе-жекте бір ұпай саны бойынша жеңілді. Оның өзін­де Дүйсәлінің жеңіл­гені көп­ші­лігімізге күмән туғызды. Әлем чемпионатында Ресей құ­рамасы 4 алтын, 1 күміс, 3 қола жүл­демен жалпыкомандалық есеп­те бірінші орынды жеңіп алды. Екінші орынды 2 алтын, 1 күміс, 2 қола мелальмен Өзбекстан құ­рамасы иеленді. Осы ретте соңғы жылдары өзбек боксының жыл­дам дамып келе жатқанын айту керек. Енді олар осы қар­қын­мен жүре берсе, біраз уақыттан кейін бүкіл әлемді өзіне қара­тып, мойындататыны сөзсіз. Биыл­ғы бәсекенің тосын жаңа­лығы Австралия құрамасы бол­ды. Бұған дейін еш жерде құрмет тұғырының биік сатысы­нан көрінбеген жасыл құрлық­тың құрамасы Астана төрінде 2 алтын жүлде алып, үшінші орынды иеленді. Биылғы чемпионатта Тәжік­станға аса талантты боксшы Асрор Вохидов (48 кг.) алтын жүлдені сыйға тартты. Оған жарыс соңында әлем чемпио­на­тының ең үздік боксшысы атағы берілді.  Бұл бәсекеде 4 алтын жүлдені жеңген Ресей құрамасы қандай марапатқа да лайық екенін көрсетті. Астанаға екі құраммен келген ресейліктердің өнері әлі көпке дейін есімізден кетпейтіні сөзсіз. Әсіресе, 66 ки­лодағы Александр Агафонов­тың өнері бір төбе әңгіме деуге болады. Ол биылғы сында 2016 жылғы Олимпиада чемпионы екенін көрсетіп кетті. Сондай-ақ, осы жарыста Шамиль Мальсагов, Тамерлан Магомедов, Лепаруш Акопян болашағынан зор үміт күт­ті­ретін боксшы екендерін көрсетіп берді. Дастан КЕНЖАЛИН.