«Батыс Еуропа – Батыс Қытай» транзиттік дәлізі құрылысында мердігер ұйым болып табылатын Оңтүстік Қазақстан облысындағы «Азеркопу/Тепе» бірлескен кәсіпорнының нысанында жұмысшылар компания басшылығына еңбек жағдайларында орын алған кемшіліктерді атап көрсетіп талаптар қойған. Олардың қатарында жұмысшыларға еңбек келісім-шарттарының берілмеуі, жұмыс киімдерімен қамтамасыз етілмеу, еңбек заңдылықтарының сақталмауы, ауыз судың уақытылы жеткізілмеуі сияқты мәселелер бар.
Осы жәйттің анық-қанығына жетуді тікелей қолға алған «Нұр Отан» партиясының мүшелері бұрмалаушылықтардың бар екенін анықтады.
Осыған орай, Партиялық бақылау комитетінің басшылығы, жергілікті атқару органдарының өкілдері және «Азеркопу/Тепе» компаниясының басшыларының қатысуымен арнайы кеңес өткізілді. Кеңесте сөз сөйлеген «Нұр Отан» ХДП Партиялық бақылау комитетінің төрағасы Боран Рахымбеков кемшіліктердің орын алғандығын атап өте отырып, егер олар таяу уақытта жойылмаса Көлік және коммуникация министрлігі Автомобиль жолдары комитеті басшылығының партиялық жауапкершілігі туралы мәселені қараудың күн тәртібіне қойылатындығына назар аударды.
Компания басшылығы кемшіліктерді мойындады, сөйтіп, кеңес қорытындысында оларды 3 тамызға дейін жою керек деген шешім қабылданды.
«Егемен-ақпарат».