Мағжан Жұмабаев атындағы облыстық ғылыми-әмбебап кітапханасында «Нұр Отан» халықтық-демократиялық партиясы Ақмола облыстық филиалымен бірлесіп өткізген «Кітап сыйла – ізгілік сыйла» акциясының қорытындысы шығарылды.
Жиналған қауым алдында сөз алған «Нұр Отан» ХДП облыстық филиалы төрағасының бірінші орынбасары Ғалым Шойкин ауыл кітапханаларын баспа өнімдерімен толықтыруды мақсат ететін шараның терең маңызы барлығын атап өтті. Облыстық партия ұйымы бұған дейін балалар үйлерінің, қылмыстық атқару жүйелерінің кітапханаларын толықтыруда белсенді жұмыс атқарды. Алдағы кезде де жүректерге ізгілік нұрын құятын акцияларды жалғастыру ниеті қолдау тауып отыр. Оған өзге де қоғамдық ұйымдар мен ұлттық-мәдени орталықтарды жұмылдыру көзделген.
Облыстық тілдерді дамыту басқармасының бастығы Ғосман Төлеғұл мен облыстық мәдениет басқармасы бастығының орынбасары Базарбай Кәкенов, облыстық кітапхананың директоры Арман Бердалин және басқалар акцияға қатысушыларға алғыс сезімдерін білдірді.
Қазіргі кезде игі дәстүрге айнала бастаған шараға жұртшылық айрықша көңіл бөліп, белсенділік танытып отыр. Мәселен, Сара Мұқатова өзінің отбасылық кітапханасынан 360 атаудағы тарихи, техникалық және көркем әдеби кітаптарын сыйға тартқан. Жалпы, акция барысында 4 мыңнан астам кітап жиналып, ауылдардағы білім ошақтарына жіберілді.
Бақберген АМАЛБЕК,
Ақмола облысы.